Orta ümumtəhsil məktəblərində bir vaxtlar tədris olunan fənnlər arasında “İnsan və cəmiyyət”də yer alırdı. Hal-hazırda isə təhsil ocaqlarında bu fənnin tədrisi dayandırılıb.
Ekspertlərin fikrincə cəmiyyətdə neqativ hallara daha çox rast gəldiyimiz bu günlərdə sosial yönümlü fənnlərin tədrisi olduqca vacibdir. Bunlara “Psixologiya”, “Etika və estetika, davranış qaydaları” və s. daxildir.
Psixoloq Fərqanə Mehmanqızı Ednews-a açıqlamasında orta ümumtəhsil məktəblərində “Psixologiya” fənninin tədrisinə müsbət yanaşdığını qeyd edir.
Onun sözlərinə görə, “Psixologiya” orta məktəblərdə fənn kimi tədris olunarsa, psixoloqlar uşaqları daha yaxından tanıyar, valideynlərlə münasibətdə olar, onların psixoloji vəziyyətini tez çözərək aradan qaldırar.
Sosioloq Ağasəlim Həsənov Ednews-a açıqlaması zamanı “İnsan və cəmiyyət” fənninin bu və ya digər adda tədrisinin çox vacib olduğunu vurğulayıb.
“Bu, Sovetlər dövründə “İctimaiyyət”, sonra isə “İnsan və cəmiyyət” adı ilə tədris olunurdu. Belə bir fənnin şagirdlərə öyrədilməsi Azərbaycan üçün aktuallıq kəsb edir. Təhsil institutu cəmiyyətin ailə, din və digər sosial institutları kimi əsas funksiyanı yerinə yetirir. Təhsil üzərinə düşən funksiyanı yerinə yetirə bilmədikcə çoxlu problemlər ortaya çıxır. Bu proses təkcə elmi biliklərin şagirdlərə çatdırılmasından ibarət deyil. Şagird yüksək nəticələr göstərə bilər, amma onun məktəbdə şəxsiyyət kimi formalaşdırılmasını şərtləndirən amillər var. İnsanın bu dünyada yeri və rolu, fərdin şəxsiyyət kimi formalaşması, fərdlərarası sosial münasibətlər, dünya görüşünün formalaşması həm də təhsil institutu ilə bağlıdır”.
Sosioloq qeyd edib ki, cəmiyyət inkişaf etdikcə dəyərlər, baxışlar, ictimai fəaliyyətdə dəyişiklik baş verdikcə tədris proqramı günün tələblərinə uyğun dəyişir və yenilənir.
“Bu gün virtual reallıq formalaşıb və tədris onlayn şəkildə keçirilir. Cəmiyyətdə virtual reallıq hakimdirsə, “İnsan və cəmiyyət” dərsliyi hazırlanarkən şagirdlərin maraq dairəsi nəzərə alınaraq bu mövzuda aktuallıq kəsb edən məqamları onların qavrayacağı səviyyədə proqrama daxil etmək olar”.
Qeyd edək ki, məsələ ilə bağlı Təhsil Nazirliyinə sorğu ilə müraciət etdik. Mövzunu diqqətdə saxlayacağıq.
Gülnar Səlimova
.jpeg)