Xəbər verdiyimiz kimi, Türkiyə Prezidenti Rəcəb Tayyib Ərdoğan zəlzələdən ən çox zərər çəkən 10 əyalətdən biri olan Adıyamanda çıxışı zamanı bildirib ki, zəlzələ zamanı həyatını itirənlər şəhiddir. 

Prezident bildirib ki, İslam inancına görə, təbii fəlakətlər nəticəsində həlak olanların məqamı şəhadət, şəhidlik hesab olunur.

Doğurdanmı İslama görə təbii fəlakət zamanı həlak olanlar şəhid sayılır?

Ednews-a danışan ilahiyyatçı Tural İrfanın sözlərinə görə, Həzrət Məhəmməd peyğəmbərin hədislərində buyurulur ki, vətən, din, ədalət uğrunda, ailəsinin mühafizəsi üçün, həyatını itirən, elm üçün yola çıxıb ölən, vəba, taun və digər yoluxucu xəstəliklərdən ölən, uçqun altında qalan, zəlzələdə ölən hər kəs şəhiddir.

“Sadəcə bu şəhidlərin mərtəbələri var. Ən uca mərtəbədə Vətən, Allah yolunda həyatını itirən şəxslərdir. Cənab Ərdoğan türk dünyasının siyasi lideri olmaqla yanaşı eyni zamanda dini lideri də hesab olunur. Çünki dini təhsili var və dinə riayət edir. Odur ki, Peyğəmbərin digər hədisində qeyd olunur ki, zəmanəsinin imamını, yəni siyasi - dini liderini tanımadan ölən cahil kimi ölmüşdür. Bu gün dini liderlərin deməli olduğu mühüm məsələləri də Ərdoğan deyirsə zəmanənin imamı da odur. Odur ki, zəlzələ Allahdan gəldiyi üçün orada ölənlərin şəhid olma hökmünü də o verir. Hesab edirəm ki, tamamilə doğrudur, ölənlər hamısı şəhiddir. İstər pandemiyada, istər zəlzələdə ölənlər İslam dininə görə şəhid hesab olunur. Lakin onlara yaşadıqları dövlət tərəfindən rəsmi şəhidlik statusunun verilib verilməməsi başqa mövzudur. O status olmasa belə həmin insanlar, uşaqlar, qocalar şəhiddir”. 

Oğuz Ayvaz