Milli Məclisin iclasında “İctimai Televiziya və Radio Yayımları Şirkəti Yayım Şurasının tərkibində dəyişiklik edilməsi haqqında” məsələnin müzakirəsi zamanı deputatlar bayağı verilişlərə görə telekanalları tənqid ediblər. Parlament nümayəndələri verlişlərin bayağı olmasından və maarifləndirici verilişlərə yönəlməməsindən gileyləniblər. Həmçinin, mentalitetimizə uyğun olmayan verlişlərin də  olduğunu bildiriblər.

Araşdırmalara görə, TV-lərə baxanların sayı dünyada 5-6 il öncəki tamaşaçıların sayı ilə müqayisədə bir neçə dəfə azalıb.

“44 günlük Vətən müharibəsindən sonra televiziya kanallarını izləyənlərin sayı artmışdı”.

Bu sözləri Ednews-a açıqlamasında filologiya üzrə elmlər doktoru, professor Qulu Məhərrəmli açıqlamasında deyib.

Onun sözlərinə görə, televiziya kanallarına baxanların sayının azalması yeni məsələ deyil. 

“Bu neçə ildir ki, azalmağa doğru gedir. Lakin 44 günlük Vətən müharibəsindən sonra tamaşaçı auditoriyaya geri qayıtmışdı. Çünki, əlavə informasiyalar çox idi. Kanallar tamaşaçı toplaya bilirdi. Son 2 il ərzində isə yenidən bayağı verlişlər, dayaz aparıcılar və “bəyaz gecələr” kanallarda ciddi problemlər yaradır”.

Professor senzura tətbiq etməklə televiziyalarda olan bayağılığın qarşısını almaq mümkün olmayacağını da qeyd edib.

“Televizya azadlıq və sərbəstlik  sevir. Bununla yanaşı məsuliyyət və peşəkarlıq da tələb edir. Bunun bircə yolu var. Televiziyada maraqlı və maarifləndirici proqramlar etmək üçün peşəkarların sayı artmalıdır. Televiziya cəmiyyət qarşısında öz məsuliyyətini dərk etməlidir. Bunun nəticəsində də televizyalar öz məcrasına qayıtmalıdırlar. Belə olmazsa kanallar tamaşaçısını tam itirəcək.  Düzü, sosial şəbəkələr xeyli auditoriyanı özünə cəlb edib. Amma maraqlı televiziya verlişi olarsa baxanların sayı çox olacaq. Televizyalar yeni texnoloji mühitə tez şəkildə alışmalı və sosial media marketinqini gücləndirməlidir”.

Aysel Şahmar