Məhərrəm ayının başlanması ilə Azərbaycanda ənənəvi sual yaranır. Bu ayda “toy edəkmi, etməyəkmi”. Bu sualın cavabı bəziləri üçün hələ də məlum deyil.
Ednews-a danışan ilahiyyatçı Tural İrfan açıqlamasında bildirdi ki, İslamda elə bir qayda yoxdur. İslam dininə görə toyu, nişanı, xeyirli mərasimi təxirə salmaq olmaz.
“Hər zaman icra etmək olar. Bu, sonradan qondarılan xurafatdır: biri deyir May ayında toy olmaz, digəri deyir Məhərrəm ayında etmək olmaz. Sadəcə yaxşı olar ki, Aşura günü deyilən gün var ki, İmam Hüseyn əleyhissəlamın və yaxınlarının şəhid olduğu günə təvafüq edir, həmin gün etməyəsən. Ən azı ehtiram olaraq. Əslində heç bu da İslamda yoxdur. Amma İslam dini ürfə, adətə önəm verən dindir, bu sarıdan dedim. Bu ay əslində şərəf, vüqar, iqbal ayıdır. Bu ayda İslam aləminin böyük öndərlərindən olan İmam Hüseyn şəhadət adlı uca məqama nail olub. Cənnətə gedib, dünyada, axirətdə ali məqama sahib olub”.
İlahiyyatçı vurğuladı ki, ona görə bu ayı yasa çevirmək, xurafatlara baş vurmaq, matəm keçirmək İmam Hüseynin yoluna ziddir.
“Bəyəm o şəhid oldu ki, insanlar 1400 il sonra toy etməsinlər, sevinməsinlər? Xeyr. Bu belə deyil. Bu ayı matəmə onu öldürüb sonra da peşman olanlar çevirib. Peşman olub qəbrinin üstündə başlayıblar başlarına, gözlərinə döyməyə. Sonra da yayılıb müxtəlif ölkələrə. İslamda matəm adam öləndən sonra 3 gündür. Peyğəmbər özü vəfat edərkən də belə ediblər. Hər il insanın ölüm gününü qeyd etmək, matəm saxlamaq qədim Sasani, fars şahlarının ənənəsidir ki, İmam Hüseynin həyat yoldaşı fars olduğu üçün farslar bunu İslama daxil edib”.
Aynurə İsmayıl
