"2014-cü ildə çevriliş olmasaydı, Krım Ukraynanın tərkibində qalardı."

EDnews APA-ya istinadən xəbər verir ki, bunu Rusiyanın xarici işlər naziri Sergey Lavrov amerikalı jurnalist Taker Karlsona müsahibəsində bildirib.

Ukrayna münaqişəsinin sülh yolu ilə həlli ilə bağlı Rusiyanın əsas şərtləri haqqında danışan Lavrov qeyd edib ki, Ukraynanın NATO-ya daxil olmaması, Ukraynada xarici hərbi bazaların olmaması, Ukrayna ərazisində xarici qoşunların iştirakı ilə hərbi təlimlərin keçirilməməsi Moskvanın əsas şərtləridir.

Lavrov münaqişənin həlli zamanı dörd yeni regionun Rusiyanın tərkibinə daxil olması faktını nəzərə almağın lazım olduğunu söyləyib.

Rusiya-Amerika münasibətləri haqqında danışan Lavrov ölkəsinin Moskva və Vaşinqtonun əməkdaşlıq edə bilməməsi üçün heç bir səbəb görmədiyini vurğulayıb: “Rusiya ABŞ ilə müharibə haqqında düşünmür və onu istəmir, belə bir müharibə nüvə xarakterli ola bilər, Moskva üçün əsas ondan qaçmaqdır.

Rusiya və ABŞ rəsmi olaraq müharibə aparmır, Ukraynada baş verənlər hibrid müharibədir. Rusiya vəziyyəti gərginləşdirmək istəmir, onun “Oreşnik” sınağı şəklində ABŞ-yə verdiyi siqnalın ciddi qəbul edildiyinə ümid edir.

“Oreşnik”in buraxılması fonunda lazımi nəticələr çıxarmasalar, Rusiya Qərbə əlavə “mesajlar” göndərməyə hazırdır. “Oreşnik” zərbəsi ABŞ və onun müttəfiqlərinə Moskvanın strateji məğlubiyyətin qarşısını almağa hər vasitə ilə hazır olacağına işarədir. Rusiyada “qırmızı xətlərin” olmaması bağlı Qərbdə səslənən bəyanatları çox ciddi səhvdir”.

Rusiya XİN başçısı mümkün nüvə müharibəsindən də danışıb. Bildirib ki, nüvə zərbələrinin məhdud mübadiləsi haqqında söhbətlər Rusiyanın istəmədiyi fəlakətə dəvətdir.

Lavrov Donald Trampın güclü insan olduğunu, hər şeyi təxirə salmağı sevmədiyini söyləyib: “Tramp söhbətdə mehribandır, amma bu, onun rusiyapərəst olması demək deyil”.