Birinci Qarabağ müharibəsində itkin düşmüş şəhid Rauf Əhmədovla Goranboy rayonunun Sarov kəndində vida mərasimi keçirilir.
EDnews xəbər verir ki, mərasimdə şəhidin ailə üzvləri, rayon İcra Hakimiyyətinin rəsmiləri, hərbçilər, şəhidimizin döyüş yoldaşları, müharibə veteranları və rayon ictimaiyyətinin nümayəndələri iştirak edirlər.
R.Əhmədov doğulduğu Goranboy rayonunun Sarov kənd qəbiristanlığında torpağa tapşırılıb.
Qeyd edək ki, Rauf Əhmədov 1969-cu ildə doğulub. Birinci Qarabağ müharibəsi başlayandan sonra könüllü olaraq orduya qatılıb. O, Murov, Kəlbəcər, Ağdam və Ağdərə istiqamətlərində erməni işğalçılarına qarşı döyüşlərdə iştirak edib. Sonuncu döyüşü 1993-cü ildə Ağdərə istiqamətində olub və orada itkin düşüb. Həmin zaman şəhidimizin 24 yaşı olub.
***
Birinci Qarabağ müharibəsinin itkin şəhidi Dəyanət Salik oğlu Musayev bu gün Ucar rayonunda dəfn olunub.
Əvvəlcə rayonun Boyat kəndində itkin şəhidlə vida mərasimi keçirilib. Mərasimdə cənazə namazı qılınıb.
Vida mərasimindən sonra itkin şəhid Boyat kənd qəbirsanlığında torpağa tapşırılıb.
Qeyd edək ki, Dəyanət Musayev 1973-cü ildə Ucarın Boyat kəndində anadan olub. O, 1993-cü ildə Kəlbəcər rayonunun, silsiləsi ərazisində gedən döyüşlərdə itkin düşüb.
***
Birinci Qarabağ müharibəsində itkin düşmüş şəhid Möysüm Murad oğlu Əliyevin nəşi Füzuli rayonunun İkinci Mahmudlu kənd qəbiristanlığında torpağa tapşırılıb.
Əvvəlcə şəhidlə vida mərasimi keçirilib, cənazə namazı qılınıb. Mərasimdə şəhidin ailə üzvləri, Füzuli Rayon İcra Hakimiyyətinin nümayəndələri, hüquq-mühafizə orqanlarının əməkdaşları, hərbi qulluqçular, müharibə iştirakçıları və rayon ictimaiyyətinin nümayəndələri iştirak ediblər.
Vida mərasimindən sonra şəhid hərbi orkestrin müşayiəti və yaylım atəşi altında son mənzilə yola salınıb.
Qeyd edək ki, M.Əliyev 1973-cü ildə Füzuli rayonunda anadan olub. Birinci Qarabağ müharibəsi zamanı döyüşlərə qatılan Möysüm Əliyev 1994-cü ildə Füzuli rayonunun Aşağı Əbdürrəhmanlı kəndi istiqamətində gedən döyüşlər zamanı itkin düşüb.
Şəhidin şəxsiyyəti aparılan eyniləşdirmə tədbirləri nəticəsində müəyyən edilib. O, Birinci Qarabağ müharibəsində itkin düşmüş hesab olunan və şəxsiyyəti müəyyənləşdirilərək doğma yurdunda dəfn edilən şəhidlərdən biridir.
***
Birinci Qarabağ müharibəsində itkin düşmüş mülki şəhidlərimizdən olan Mədinə Babayeva da dəfn olunub.
Dəfn mərasimində şəhidlərin ailə üzvləri, Kəlbəcər üzrə prezidentin xüsusi nümayəndəliyinin rəsmiləri, rayon ictimaiyyətinin nümayəndələri iştirak edirlər.
Mərasim ilk olaraq Daşbulaq kəndində keçirilib.
Hazırda isə Zar kəndində digər mülki şəhid Bahadur Kamalov dəfn edilir.
Məlumat üçün bildirək ki, 1937-ci il təvəllüdlü Bahadur Kamalov 1993-cü ildə Murovdağ istiqamətində, 1905-ci il təvəllüdlü Mədinə Babayeva isə Daşbulaq kəndində itkin düşüb.
