Azərbaycanda qumar oyunlarına qarşı mübarizə tədbirləri daha da sərtləşdirilir.
Yeni qanun dəyişikliyinə əsasən, qumar oynadığına görə inzibati məsuliyyətə cəlb edilən şəxs eyni əməli bir il ərzində təkrar törədərsə, onu daha ağır cəza, o cümlədən inzibati həbs gözləyəcək.
Qəbul edilən dəyişiklik qumar oyunlarının yayılmasının qarşısının alınması, qanunsuz pul dövriyyəsinin məhdudlaşdırılması və bu sahədə təkrar pozuntulara yol verən şəxslərin məsuliyyətinin artırılması məqsədi daşıyır.
Mövzu ilə bağlı EDnews-a danışan sabiq millət vəkili Rüfət Quliyev qeyd edib ki, belə halların qarşısı mütləq alınmalıdır:
"Artıq virtual qumar oyunları sosial şəbəkələr vasitəsilə birbaşa insanların qarşısına çıxır. İnternetə daxil olan kimi istifadəçilərə müxtəlif təkliflər təqdim edilir. Əgər söhbət virtual kazinolardan gedirsə, buna hər zaman “yox” demişəm və bundan sonra da deyəcəyəm. Qumar oynamaq istəyən şəxs qanuni fəaliyyət göstərən mərc platformalarından istifadə edə bilər. Lakin qeyri-qanuni platformaların böyük əksəriyyəti insanları aldadır. Toplanan vəsait ölkədən çıxarılır, vergi ödənilmir. Dünya təcrübəsində qumar və kazino fəaliyyəti müəyyən qədər qəbul edilmiş proses sayılır. Bu sahə qanuniləşdirilərsə və vergiyə cəlb olunarsa, insanlar da əmin ola bilərlər ki, burada dələduzluq baş verməyəcək".
Tətbiq edilən məhdudiyyətlərə rəğmən, belə fəaliyyətlərin davam etməsinə gəlincə isə deputat əlavə edib ki, bu, artıq bütün dünyada geniş yayılmış bir problemə çevrilib:
"Onlarla mübarizə aparmaq üçün həmin şəxslərdən daha hazırlıqlı və daha çevik olmaq lazımdır. Bu isə olduqca çətin məsələdir. Dünyanın bir çox ölkəsi bu cür fəaliyyətlərlə mübarizə aparır. Azərbaycan da bu istiqamətdə tədbirlər görür".
Aytac Kərimova | EDnews
