"Prezident İlham Əliyev IV Şuşa Qlobal Media Forumunda Azərbaycanın milli maraqları, beynəlxalq təşkilatların ölkəmizə qarşı ədalətsiz mövqeyi və regional proseslərlə bağlı çox mühüm mesajlar verdi".
Bunu millət vəkili Ceyhun Məmmədov EDnews-a açıqlamasında deyib:
"Dövlət başçısı həm 907-ci düzəlişin ləğvinin vacibliyinə, həm də Azərbaycanın Avropanın enerji təhlükəsizliyində oynadığı strateji rola xüsusi diqqət çəkdi. Forumda səsləndirilən fikirlər Azərbaycanın beynəlxalq mövqeyinin daha da gücləndiyini bir daha nümayiş etdirdi. Ölkə başçısı çıxışı zamanı Avropa Şurası Parlament Assambleyasının və digər Avropa təsisatlarının Azərbaycana qarşı uzun illər ərzində sərgilədiyi ədalətsiz yanaşmaya toxundu. Həmin qurumlar yol verdikləri səhvləri etiraf etməli və ölkəmizə münasibətdə daha obyektiv mövqe nümayiş etdirməlidirlər. Azərbaycan uzun illər işğala məruz qalan tərəf olsa da, bəzi beynəlxalq dairələr tərəfindən əsassız ittihamlarla üzləşib. Halbuki işğalçı tərəf Ermənistan idi. Artıq Qərb bunu açıq şəkildə qəbul və etiraf etməlidir”.
Ceyhun Məmmədov qeyd edib ki, dövlət başçısının ABŞ-nin Azərbaycana qarşı tətbiq etdiyi 907-ci düzəlişlə bağlı səsləndirdiyi fikirlər də xüsusi əhəmiyyət daşıyır:
“Vaxtilə qəbul olunan bu qərar tamamilə ədalətsiz idi. İşğala məruz qalan Azərbaycan olduğu halda, sanksiya tətbiq edilən də məhz ölkəmiz oldu. Amerika Birləşmiş Ştatları bu düzəlişin tam ləğvi istiqamətində konkret addımlar atmalıdır. Prezident İlham Əliyev Azərbaycanın Avropanın enerji təhlükəsizliyində oynadığı mühüm roldan da geniş bəhs edib. Bu gün Azərbaycan bir sıra Avropa ölkələrinə qaz ixrac edir. Ölkəmizin enerji tərəfdaşlarının sayı getdikcə artır. Suriyaya Azərbaycan qazının ixracı məsələsinin gündəmə gətirilməsi də Azərbaycanın enerji coğrafiyasının genişləndiyini göstərir”, -deyə o bildirib.
Deputat əlavə edib ki, Azərbaycan-ABŞ münasibətləri ilə bağlı səsləndirilən fikirlər Forumun ən mühüm məqamlarından biri olub. Ceyhun Məmmədovun sözlərinə görə, Şuşa Qlobal Media Forumu dünyada gedən proseslərin təhlili, qlobal çağırışların müzakirəsi və Azərbaycan həqiqətlərinin beynəlxalq ictimaiyyətə çatdırılması baxımından mühüm platformaya çevrilib.
Qeyd edək ki, iyulun 13-də Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumunun açılış mərasimi keçirilib.
Aytac Kərimova | EDnews
