“Ermənistanda hakim “Vətəndaş müqaviləsi” partiyası yenidən qələbə qazandı. Düşünürəm ki, Nikol Paşinyan yeni hökumət kabinetində müəyyən dəyişikliklər edəcək”.
Politoloq Məhəmməd Əsədullazadə bunu Ermənistanda keçirilən parlament seçkilərini EDnews-a şərh edərkən bildidirib.
.jpg)
O hesab edir ki, bu dəyişikliklər Ermənistan parlamentinin spikeri Alen Simonyan, Ermənistanın xarici işlər naziri Ararat Mirzoyan, müdafiə naziri Suren Papikyan və Ermənistan baş nazirinin müavini Mher Qriqoryan kimi əsas fiqurlara şamil olunmayacaq:
“Digər nazirlərin, xüsusilə ədliyyə, iqtisadiyyat və milli təhlükəsizlik sahələrində dəyişdirilməsi mümkündür. Amma ümumilikdə hesab edirəm ki, Mher Qriqoryan, Ararat Mirzoyan, Alen Simonyan və Suren Papikyan Paşinyanın komandasında qalacaqlar. Çünki Nikol Paşinyan hakimiyyətə bu şəxslərlə gəlib. Onlar onun yaxın silahdaşlarıdır və Paşinyan məhz bu komanda ilə siyasi mövqeyini gücləndirib. Bu şəxslərin həm hakimiyyət daxilində, həm də cəmiyyətdə müəyyən mövqeləri var. Bununla belə, hər yeni hökumət formalaşanda kabinetdə müəyyən yenilənmələrin olması təbiidir. Parlamentdə də yeni üzvlər seçilir. Bundan əlavə, Nikol Paşinyan 2019-cu ildən etibarən baş nazir kimi hökuməti formalaşdırır və bu istiqamətdə kifayət qədər təcrübə qazanıb. Bu baxımdan, onun yeni kadrları da komandaya cəlb edəcəyi istisna deyil”.
Xatırladaq ki, iyunun 7-də Ermənistanda parlament seçkiləri keçirilib. Ermənistanın Baş naziri Nikol Paşinyanın "Vətəndaş müqaviləsi" partiyası bülletenlərin 100 %-i sayıldıqdan sonra 49,81 % səs toplayıb. "Vətəndaş müqaviləsi" partiyasına 727,160 seçici səs verib. İş adamı Samvel Karapetyanın "Güclü Ermənistan" bloku 23,29 %, sabiq prezident Robert Köçəryanın "Ermənistan" bloku 9,94 %, iş adamı Qaqik Tsarukyanın "Çiçəklənən Ermənistan" partiyası isə 4 % səs toplayıb. Qalan partiya və bloklar keçid bariyerini aşa bilməyib. Bu nəticələrə əsasən, Ermənistan parlamentində 105 deputat fəaliyyət göstərməlidir. Hakim “Vətəndaş müqaviləsi” Partiyası parlementdə 61 deputat mandatı qazanıb.
Günəş Mərd | EDnews
