IBM şirkəti dünyada ilk dəfə 0,7 nanometrlik texnoloji proses əsasında hazırlanan çipi təqdim edib.
EDnews xəbər verir ki, bu barədə “Gazeta.Ru” şirkətin məlumatına istinadən xəbər yayıb.
Məlumata görə, yeni çip yarımkeçirici sənayenin inkişafında növbəti mərhələ hesab olunur və mikrosxem istehsalını atom ölçülərinə daha da yaxınlaşdırır.
Bildirilib ki, dırnaq ölçüsündə olan çipdə təxminən 100 milyard tranzistor yerləşdirilib. Bu göstərici IBM-in 2021-ci ildə təqdim etdiyi 2 nanometrlik çiplə müqayisədə elementlərin yerləşmə sıxlığının təxminən iki dəfə artırıldığını göstərir.
Yeni texnologiyanın əsasını “Nanostack” adlı üçölçülü tranzistor arxitekturası təşkil edir. Bu arxitektura tranzistor elementlərini şaquli şəkildə yerləşdirməyə və hər təbəqədə fərqli materiallardan istifadə etməyə imkan verir. Şirkət bunun performansın və enerji səmərəliliyinin artırılmasına xidmət etdiyini bildirib.
IBM-in qiymətləndirməsinə görə, yeni texnologiya 2 nanometrlik çiplərlə müqayisədə məhsuldarlığı 50 faizə qədər artıra və ya enerji səmərəliliyini 70 faizə qədər yüksəldə bilər. Bundan başqa, “Nanostack” arxitekturası SRAM yaddaş sahəsini təxminən 40 faiz azaltmağa imkan verir ki, bu da süni intellekt sistemləri və bulud infrastrukturu üçün xüsusi əhəmiyyət daşıyır.
Şirkət texnologiyanın artıq eksperimental şəkildə sınaqdan keçirildiyini və real hesablama əməliyyatlarını yerinə yetirə bildiyini açıqlayıb.
İlk kommersiya məhsullarının isə təxminən beş ildən sonra bazara çıxacağı gözlənilir.
