ABŞ-ın Corciya ştatında baş verən güclü meşə yanğınları geniş əraziləri əhatə edərək ciddi fəsadlara səbəb olub. Yüzlərlə insan evlərini tərk etmək məcburiyyətində qalıb.
EDnews xəbər verir ki, yerli medianın məlumatına görə, ABŞ-ın Corciya ştatında baş verən güclü meşə yanğınları nəticəsində təxminən 55 140 akr (22 314 hektar) ərazi yanıb və azı 120 ev məhv olub.
Məlumata əsasən, yanğınlar ştatın cənubunda yerləşən Klinç və Brantli qraflıqlarında qeydə alınıb və son illərin ən dağıdıcı hadisələrindən biri kimi qiymətləndirilir.
Bildirilir ki, yanğınlar bir həftədən artıqdır davam edir. Bazar günü gecəsi yağan ildırımlı yağışlar alovların şiddətini qismən azaltsa da, onların tam söndürülməsi üçün kifayət etməyib.
Hadisə nəticəsində yüzlərlə sakin evlərini tərk edərək təhlükəsiz ərazilərə – otellərə və müvəqqəti sığınacaqlara yerləşdirilib. Bəzi ailələrə ziyanı qiymətləndirmək üçün geri qayıtmağa icazə verilsə də, bir çox sakin hələ də evlərinin taleyi ilə bağlı qeyri-müəyyənlik yaşayır.
Son məlumatlara görə, Klinç qraflığında baş verən “Pineland” yanğını 32 540 akr ərazini əhatə edib və onun yalnız 23 faizi nəzarət altına alınıb. Brantli qraflığında isə 21 600 akrdan çox sahə yanıb və yanğının cəmi 6 faizi söndürülüb.
Hazırda 410-dan çox xilasedici, helikopterlər və xüsusi texnika yanğınların qarşısını almaq və yayılmasının qarşısını almaq üçün əməliyyatları davam etdirir.
