“Qlobal iqtisadiyyatda geosiyasi gərginliklərin, ticarət müharibələrinin və maliyyə risklərinin davam etdiyi bir şəraitdə, Bakı Enerji Forumu çərçivəsində aparılan müzakirələr Azərbaycanın investisiya mühiti ilə bağlı dünyaya müsbət siqnalların verilməsi baxımından mühüm əhəmiyyət kəsb edir”.
İqtisadçı Akif Nəsirli bunu EDnews-a danışarkən bildirib..jpg)
O qeyd edib ki, bu platforma təkcə enerji sahəsində əməkdaşlıq deyil, həm də ölkənin strateji inkişaf istiqamətlərini beynəlxalq investorlara təqdim etmək üçün böyük imkandır:
"Əməkdaşlıqların real investisiyalara çevrilməsi ilk növbədə tərəflərin uzunmüddətli maraqlarının nə dərəcədə üst-üstə düşməsindən asılıdır. Azərbaycanın enerji təhlükəsizliyi sahəsində etibarlı tərəfdaş kimi formalaşmış nüfuzu, beynəlxalq öhdəliklərə sadiqliyi və mühüm nəqliyyat-kommunikasiya marşrutlarının üzərində yerləşməsi investisiya qərarlarına müsbət təsir göstərən amillər sırasındadır. Xüsusilə Avropanın enerji mənbələrinin şaxələndirilməsi siyasəti Azərbaycanın enerji layihələrinə marağı artırır və forumda əldə olunan təmasların konkret layihələrə çevrilməsi ehtimalını yüksəldir”.
İqtisadçının fikrincə, hazırda investorlar üçün ən cəlbedici istiqamətlərdən biri bərpaolunan enerji sektorudur. Günəş və külək enerjisi üzrə mövcud potensial, yaşıl enerji keçidinə dair dövlət strategiyası investisiya marağını artırır:
"Qarabağ və Şərqi Zəngəzurun yaşıl enerji zonası kimi inkişaf etdirilməsi də yeni investisiya imkanları yaradır. Bu ərazilərdə enerji istehsalı, enerji saxlama sistemləri və müasir infrastruktur layihələri investorların diqqət mərkəzindədir. Bununla yanaşı, neft-qaz sektoru hələ də öz cəlbediciliyini qoruyur. Enerji bazarında keçid dövrünün yaşanmasına baxmayaraq, təbii qazın yaxın onilliklərdə qlobal enerji balansında mühüm yer tutacağı gözlənilir. Həmçinin Azərbaycanın Şərq-Qərb və Şimal-Cənub nəqliyyat dəhlizlərinin kəsişməsində yerləşməsi, Orta Dəhliz üzrə artan yükdaşımalar logistika, limanlar və rəqəmsal logistika həlləri sahəsinə də marağı artırır", - deyə o vurğulayıb.
Akif Nəsirli əlavə edib ki, rəqəmsal iqtisadiyyat, informasiya texnologiyaları, süni intellekt tətbiqləri və data mərkəzlərinin yaradılması kimi sahələr də investorların diqqətini cəlb edən istiqamətlər sırasındadır:
“Ümumilikdə, Bakı Enerji Forumunda əldə olunan razılaşmaların əhəmiyyətli hissəsi real investisiya layihələrinə çevrilməsi üçün kifayət qədər əsaslar mövcuddur. Xüsusilə yaşıl enerji, təbii qaz, nəqliyyat-logistika və rəqəmsal texnologiyalar sahələri yaxın illərdə ən cəlbedici istiqamətlər olaraq qalacaq. Bu isə Azərbaycanın regional iqtisadi mərkəz kimi mövqeyinin daha da güclənməsinə töhfə verə bilər”.
Qeyd edək ki, Bakı Enerji Forumu hər il regional və qlobal miqyasda aparıcı enerji şirkətlərini, dövlət rəsmilərini və investorları bir araya gətirən, Xəzər regionunun enerji xəritəsini və gələcək əməkdaşlıq perspektivlərini müəyyən edən mühüm beynəlxalq platformadır.
Amin Həsənli | Ednews
