Ankarada ABŞ Prezidenti Donald Trampın NATO sammiti çərçivəsində qalacağı hotelin yaxınlığında yanğın baş verib.
EDnews xəbər verir ki, hadisə iyulun 3-ü axşam saatlarında ABŞ nümayəndə heyətinin yerləşəcəyi nəzərdə tutulan "JW Marriott" hotelinin qarşısındakı binada qeydə alınıb.
İlkin məlumata görə, yanğın qısa müddətdə yanğınsöndürənlər tərəfindən nəzarətə götürülərək söndürülüb. Hadisə nəticəsində xəsarət alanlar barədə məlumat verilməyib.
Yanğının başvermə səbəbi hələlik məlum deyil. Faktla bağlı xüsusi xidmət orqanları araşdırmalara başlayıb.
Yerli KİV-in məlumatına əsasən, iyulun 1-dən 10-dək JW Marriott otelində otaqların bronlaşdırılması dayandırılıb.
Qeyd edək ki, Ankarada NATO sammiti 7-8 iyul tarixlərində keçiriləcək. Tədbirlə əlaqədar şəhərdə təhlükəsizlik tədbirləri maksimum səviyyəyə çatdırılıb.
Sammitin təhlükəsizliyinin təmin olunmasına təxminən 70 min təhlükəsizlik əməkdaşı cəlb edilib. Paytaxtda 30-dan çox küçə bağlanacaq, əsas magistrallarda isə hərəkətə ciddi məhdudiyyətlər tətbiq olunacaq.
Sammitdə NATO-nun 32 üzv ölkəsinin nümayəndələri, eləcə də tərəfdaş dövlətlərin liderlərinin iştirakı gözlənilir.
.jpeg)
