"Nəqliyyat vasitələrinin utilizasiyası fondunun vəsaitinin formalaşdırılması və istifadə Qaydası” qərarına görə artıq avtomobil sahibləri utilizasiya üçün əlavə rüsum ödəyəcək.
Bəs bu qərar avtomobil qiymətlərinə necə təsir edəcək?
Nəqliyyat eksperti Eləniz Cəfərov bildirib ki, yaradılacaq utilizasiya fondundan avtomobil sahiblərinə pul vəsaiti veriləcək.
O, bu barədə Ednews-a danışarkən deyib.
“Bu qərarla avtomobil sahibi istehsal ilindən asılı olaraq təqribən 20 manat utilizasiya haqqı ödəyəcək. 30 ildən qədim olan avtomobillər üçün isə utilizasiya haqqı ödənilməyəcək. Ümumiyyətlə, bu pul boşuna getmir, əksinə avtomobil sahiblərinin özlərinə qayıdır. Bu vəsaitlərlə ümumi utilizasiya fondu yaradılacaq və gələcəkdə insanların bu fonddan istifadə etməsinə imkan yaradılacaq. Bu o deməkdir ki, avtomobili tamamilə yararsız hala gəlmiş insanlar həmin fonddan ayrılmış vahid məbləğlə təmin ediləcək. Bununla da şəhərlərdə yararsız və qəza şəraiti yaradan avtomobillər aradan qaldırılacaq”.
Ekspertin açıqlamasına görə, bu qərardan sonra avtomobil qiymətlərində süni bahalaşma gözlənilir.
“Təbii ki, avtomobillərin yenilənməsi üçün qəbul edilən bu qərardan sui-istifadə edənlər də olacaq. Beləki, ölkəyə gətirilən avtomobillərin texniki baxışı zamanı da rüsum tutulacaq. Bu da qiymətlərin süni şəkildə təqribi 4-5% bahalaşmasına təsir edəcək. Sadəcə olaraq, davamlı bahalaşmaya səbəb olmayacaq. Ola bilsin ki, kənd təsərrüfatı ilə məşğul olan əhali ilk vaxtlarda bu qərardan əziyyət çəksin. Çünki, onlar üçün hələ ki, dəqiq rüsum tətbiq olunmayıb. Ona görə də kənd təsərrüfatı ilə məşğul olan əhali köhnə traktor və digər texnikaların utilizasiyasından yayına bilər”.
Fərid