ABŞ və İran arasında 14 əsas bənddən ibarət anlaşma memorandumu imzalanıb.
EDnews xəbər verir ki, sənədi ABŞ Prezidenti Donald Tramp və İran Prezidenti Məsud Pezeşkian imzalayıb.
Məlumata görə, memorandum tərəflər arasında hərbi əməliyyatların dayandırılması, sanksiyaların mərhələli şəkildə aradan qaldırılması, Hörmüz boğazından ticarət gəmilərinin təhlükəsiz keçidi və İranın dondurulmuş aktivlərinə çıxış imkanları kimi məsələləri əhatə edir.
Sənədə əsasən, ABŞ və İran bütün cəbhələrdə, o cümlədən Livanda hərbi əməliyyatların dərhal və tam dayandırılması barədə razılığa gəlib. Tərəflər bir-birinin suverenliyinə və ərazi bütövlüyünə hörmət edəcəklərini, daxili işlərə qarışmayacaqlarını bəyan ediblər.
Memorandumda yekun razılaşmanın hazırlanması üçün 60 günlük danışıqlar prosesinə başlanılması nəzərdə tutulur. Bu müddət ərzində mövcud status-kvonun qorunması barədə razılıq əldə edildiyi bildirilir.
Razılaşmaya əsasən, ABŞ İrana qarşı tətbiq olunan dəniz blokadasının mərhələli şəkildə ləğvinə başlayacaq. İran isə Hörmüz boğazından ticarət gəmilərinin təhlükəsiz və maneəsiz keçidini təmin etməyə çalışacaq.
Sənəddə, həmçinin Vaşinqtonun İranın yenidən qurulması və iqtisadi inkişafı üçün 300 milyard dollarlıq plan hazırlayacağı qeyd olunur. Bundan başqa, ABŞ-ın İrana qarşı tətbiq edilən sanksiyaların ləğvini nəzərdə tutduğu, İran nefti və neft məhsullarının ixracı üçün müvəqqəti güzəştlər tətbiq edəcəyi bildirilir.
Memorandumda İranın nüvə silahı əldə etməyəcəyini bir daha təsdiqlədiyi, tərəflərin nüvə proqramı üzrə danışıqları davam etdirəcəyi vurğulanır.
Vaşinqton, eyni zamanda, İranın dondurulmuş aktivlərinin istifadəyə verilməsi istiqamətində öhdəlik götürüb.
Sənədin icrasına nəzarət etmək üçün xüsusi mexanizmin yaradılması nəzərdə tutulur. İlk mərhələ öhdəlikləri yerinə yetirildikdən sonra tərəflər yekun saziş üzrə danışıqlara başlayacaqlar.
