Enerji içkiləri qısa müddətli enerji hissi yaratsa da, uzunmüddətli dövrdə ciddi sağlamlıq problemlərinə səbəb ola bilər.
Qida Təhlükəsizliyi Hərəkatının rəhbəri, sağlam qidalanma üzrə mütəxəssis Məhsəti Hüseynova EDnews-a açıqlamasında bildirib ki, enerji içkiləri adında “enerji” sözü daşısa da, əslində orqanizm üçün bir sıra təhlükəli nəticələr yarada bilir.
Onun sözlərinə görə, xüsusilə 16 yaşdan aşağı şəxslər üçün enerji içkiləri zərərli hesab olunur:
“Bu yaş dövründə sinir sistemi, ürək-damar sistemi və daxili orqanların funksiyaları tam formalaşmadığından enerji içkilərinin istifadəsi müxtəlif sağlamlıq problemlərinə səbəb ola bilər. İlk növbədə qan təzyiqinin dəyişməsi, ürək ritm pozuntuları və ürək-damar sistemində problemlər yarana bilər”.
Mütəxəssis qeyd edib ki, bu içkilərin tərkibində yüksək şəkər miqdarı olduğundan davamlı istifadə insulin müqaviməti və diabet riskini artırır:
“Eyni zamanda sinir sisteminə təsir göstərərək əsəbi gərginlik, aqressivlik və yuxusuzluq yarada bilər”.
Məhsəti Hüseynovanın sözlərinə görə, enerji içkilərinin qazlı və turşulu tərkibi mədə yanması, qıcqırma və həzm problemlərinə səbəb ola bilir:
“Uzun müddət istifadə hallarında qaraciyər funksiyalarında pozuntular və digər orqanlara mənfi təsirlər müşahidə edilə bilər”.
Ekspert əlavə edib ki, bəzi hallarda içkilərin tərkibində istifadə olunan konservantlar, dadlandırıcılar və rəngləndiricilər də sağlamlıq üçün əlavə risk yaradır:
“Bu maddələr asılılıq meyli formalaşdıra, psixoloji vəziyyətə təsir göstərə və diş sağlamlığında problemlər yarada bilər”.
Mütəxəssis xüsusilə uşaqlara, xroniki xəstəliyi olan şəxslərə, yaşlılara, hamilə və süd verən qadınlara enerji içkilərindən uzaq durmağı tövsiyə edib.
O bildirib ki, bir çox enerji içkisində olan kofein miqdarı gündəlik qəbul normasını bir neçə dəfə üstələyə bilir:
“Bir neçə banka enerji içkisinin qəbul edilməsi ürək fəaliyyətinə ciddi yük yarada, bəzi hallarda ürək çatışmazlığı və infarkt riskini artıra bilər”.
Məhsəti Hüseynova alternativ olaraq enerji içkiləri əvəzinə təbii çaylar, tünd şokolad, nanə, limon və bal qarışığı, həmçinin açıq havada qısa yürüş və yüngül fiziki aktivliyi tövsiyə edib.
Onun sözlərinə görə, açıq havada hərəkət zamanı orqanizmdə ifraz olunan serotonin insanın özünü daha enerjili və gümrah hiss etməsinə kömək edir.
.jpg)
