Azərbaycanda unun qiyməti artıb. Belə ki, Mayda 50 kq - lıq unun kisəsi 25 - 26 manat idisə hazırda 29 manatdır. Dəvəçi - Dəyirman MMC - dən də "Turan"a ilin əvvəli ilə müqayisədə artım olduğunu təsdiqləyiblər.
Bəs bu bahalaşmaya səbəb nədir?
Mövzu ilə bağlı Ednews-a danışan iqtisadi ekspert Natiq Cəfərli Azərbaycanın bu sahədə əsasən idxaldan asılı olduğunu bildirib:
“Azərbaycanda unun qiymətinin bahalaşması taxılın qiyməti ilə əlaqəlidir. Çünki, dünya bazarında taxıın qiymətində bahalaşma müşahidə etdik. Həm, Qazaxıstanda, həm də Rusiyada daşqınlar oldu və yaz əkinləri ilə bağlı problemlər yaşandı. Məsələn Rusiya taxıl ixracatına olan rüsumları da artırdı. Azərbaycan isə idxaldan asılı olan bir ölkədir. Biz öz taxıl təlabatımızın cəmi 25%-ni özümüz təmin edirik, 75%-i isə təxmini xaricdən alırıq.”
Ekspert bildirib ki, çörək qiymətləri çox vaxt zavod çörəkləri ilə öçülsə də, digər növlər arasında ciddi bahalaşma mövcuddur:
“Xaricdən alınan buğdanın qiyməti artan kimi, bu təbii ki, dəyirmanlarda istehsal olunan unun da qiymətinə təsir göstərir. Unun qiymətinin artması isə təbii ki, ilk növbədə çörək və digər un məmulatlarına təsir göstərəcək. Bizdə niyəsə çörəyin qiyməti sadəcə zavod çörəyi ölçülür. Zavod çörəyini qiymətini tez-tez artırmasalar da, çəkini azaltmaqla qiyməti qaldırırlar. Amma, digər sahələrdə misal üçün, təndir çörəklərinin bişirildiyi yerlərdə və digər mağazalarda qiymətlər çox-çox artıb.”
Fərid Axund
