Azərbaycan və İsrail arasında təhlükəsizlik və müdafiə sahəsində strateji əməkdaşlıq daha da gücləndirilir. İsrailin müdafiə naziri Yoav Gallant və Azərbaycanın müdafiə naziri Zakir Həsənov Tel-Əvivdə rəsmi görüş keçirərək ikitərəfli münasibətlərin hərbi və texnoloji komponentlərini əhatə edən bir sıra məsələləri müzakirə ediblər. Bu görüş iki ölkə arasında artan strateji tərəfdaşlığın daha da dərinləşdirilməsi istiqamətində önəmli addım kimi qiymətləndirilir.
EDnews'a əsasən İsrail tərəfi Azərbaycanı yalnız etibarlı enerji tərəfdaşı kimi deyil, həm də regional təhlükəsizliyin möhkəmləndirilməsində fəal rol oynayan strateji müttəfiq kimi dəyərləndirib.
Müdafiə naziri Yoav Gallant görüşdə bildirib ki, “Azərbaycan Yaxın Şərq və Qafqaz regionu arasında körpü rolunu oynayır və onun sabitliyi həm bizim, həm də bütün region üçün vacibdir.”
Bu əməkdaşlıq fonunda Qafqazda və Yaxın Şərqdə davam edən gərgin geosiyasi proseslər xüsusi əhəmiyyət daşıyır. Azərbaycan İsrail üçün Cənubi Qafqazda əsas tərəfdaşlardan biridir. İki ölkə arasında diplomatik münasibətlər 1992-ci ildə qurulsa da, son illərdə bu münasibətlər daha da intensivləşib. Azərbaycan İsrailin hərbi texnologiyalarının əsas alıcılarından biridir, eyni zamanda enerji sahəsində də mühüm tərəfdaşlıq mövcuddur-Azərbaycan İsrailin neft ehtiyaclarının əhəmiyyətli bir hissəsini təmin edir.
Mədinə Məmmədova//Ednews
