Ermənistanda keçirilən parlament seçkilərinin nəticələri təkcə ölkədaxili siyasi mənzərə baxımından deyil, həm də regionda gələcək proseslərin istiqaməti baxımından diqqət mərkəzindədir.
Politoloq Yeganə Hacıyeva bunu Ermənistanda 7 iyun tarixində keçirilən parlament seçkilərinin nəticələrini EDnews-a şərh edərkən bildirib.
O hesab edir ki, Nikol Paşinyan və onun rəhbərlik etdiyi siyasi qüvvənin seçicilərin 50% səsini toplaması ölkədə mövcud siyasi kursun davam edəcəyini göstərir:
.jpg)
“Paşinyanın əsas rəqibi olan Samvel Karapetyanın “Güclü Ermənistan” siyasi blokun 23 faiz səs toplaması Ermənistanda revanşist və Rusiyaya daha yaxın siyasi xəttin cəmiyyət tərəfindən geniş dəstək almadığını ortaya qoyub”.
Politoloq qeyd edib ki, bu nəticə region üçün müsbət mesaj hesab oluna bilər:
“Bu o deməkdir ki, Rusiya ilə daha yaxın münasibətlər qurmağa, Qərbdən uzaqlaşmağa, Azərbaycan və Türkiyə ilə münasibətlərdə daha revanşist mövqe sərgiləməyə çağıran siyasi qüvvələr əhalinin çoxluğunun səsini qazana bilməyib. Bu isə region üçün pozitiv siqnaldır”.
Yeganə Hacıyevanın fikrincə, Paşinyanın seçkilərdə əldə etdiyi nəticə ona daxildə siyasi sabitliyi qorumaq və mövcud kursu davam etdirmək üçün yeni mandat verir. Bu mandat Ermənistanın Azərbaycan və Türkiyə ilə münasibətlərinin normallaşdırılması, eləcə də regionda kommunikasiya xətlərinin açılması istiqamətində daha geniş imkanlar yarada bilər.
Politoloq bildirib ki, seçkilər regionda güclər balansını ciddi şəkildə dəyişməyib:
“Əgər bu seçkinin regionda güclər balansında nəyi dəyişdiyini soruşsaq, deməliyik ki, əslində heç nə dəyişməyib. Əksinə, mövcud status-kvo daha da möhkəmlənib. Ermənistan görüntü olaraq Rusiyadan uzaqlaşmaq və Qərblə münasibətləri yaxınlaşdırmaq xətti nümayiş etdirsə də, ölkənin iqtisadi və resurs baxımından əsas tərəfdaşlarından biri hələ də Rusiyadır”.
Hacıyeva vurğulayıb ki, Rusiyanın Ermənistan daxilində ciddi təsir imkanları qalmaqdadır.
“Bu səbəbdən Ermənistanın yaxın dövrdə Rusiyaya qarşı kəskin dönüş edəcəyini gözləmək real deyil. Münasibətlərdə mövcud status-kvo necədirsə, böyük ölçüdə elə də davam edəcək”, – deyə politoloq əlavə edib.
Analitik hesab edir ki, seçkilərin nəticələri regionda daha proqnozlaşdırıla bilən və pozitiv inkişaf ssenarilərinin formalaşmasına imkan yaradır.
Onun sözlərinə görə, Paşinyanın aldığı mandat həm Ermənistan daxilində siyasi sabitliyin qorunmasına, həm də Azərbaycan və Türkiyə ilə münasibətlərin normallaşdırılması prosesinin davam etdirilməsinə təsir göstərə bilər.
Aysel Hacıyeva
.jpg)
.jpg)
