"Seçkilərdən sonra Ermənistanda ciddi siyasi proseslərin baş verəcəyi gözlənilmir. Mövcud kursda hər hansı dəyişiklik olmayacaq, əksinə, bu xətt davam etdiriləcək".
Bu fikirləri EDnews-a açıqlamasında Ümid Partiyasını sədri İqbal Ağazadə bildirib.
O, qeyd edib ki, Paşinyanın daxildə güvəndiyi və dəstək verdiyi qüvvələr gözləntiləri tam doğrultmadı. Baxmayaraq ki, Samvel Karapetyan ikinci yeri tutdu və müxalif qüvvələr birlikdə 30-dan çox mandat əldə etdilər, bu nəticələr Ermənistanda siyasi prosesləri dəyişdirəcək və ya yeni istiqamətə yönəldəcək səviyyədə deyil. Seçkilərdən sonra Azərbaycanla sülh müqaviləsi, eləcə də TRIPP dəhlizinin açılması məsələsi daha da aktuallaşacaq. Türkiyə-Azərbaycan-Ermənistan münasibətlərinin sürətli inkişaf mərhələsinə keçəcəyi gözlənilir. Paşinyan da bu istiqamətdə daha açıq və fəal səylər göstərəcək.
Rusiyanın mümkün təzyiqlərinə gəlincə, siyasətçi bildirib ki, bu təzyiqlər hələlik əvvəlki formada və ya seçkiyə qədər tətbiq olunan şəkildə davam etməyəcək:
"Rusiya bu təzyiqlərdən müəyyən qədər geri çəkiləcək və yolları açmağa məcbur olacaq. Xüsusilə fitosanitar bəhanələrlə Ermənistan məhsullarının, əsasən də kənd təsərrüfatı məhsullarının Rusiyaya buraxılmasına yaradılan maneələrin seçkilərdən sonra aradan qalxacağı gözlənilir. Çünki alternativlər gündəmə gəldikcə isə Rusiya anlayacaq ki, münasibətlər daha da pisləşərsə, Ermənistan ondan daha sürətlə uzaqlaşacaq".
Deputat onu da əlavə edib ki, Moskvanın təzyiq yolu ilə Ermənistanı öz yanında saxlamaq imkanları məhduddur:
"Buna görə də Rusiya əməkdaşlıq qapısını bir qədər geniş açmağa çalışacaq. Məqsəd Ermənistanı bu prosesdən müəyyən qədər həvəsləndirmək və ən azı Ukrayna-Rusiya münasibətləri həll olunana qədər Ermənistanın Rusiyadan uzaqlaşmasının qarşısını almaqdır. Bu baxımdan, seçkilərdən sonra ciddi dəyişiklik gözlənilmir. Proseslər indiyə qədər olduğu kimi, beynəlxalq güclərin təsiri və Paşinyanın sərgilədiyi siyasi kurs çərçivəsində davam edəcək".
Aytac Kərimova | EDnews
.png)
