Azərbaycanın 28 May – Müstəqillik Günü münasibətilə bir çox ölkələrdən rəsmi təbriklər daxil olmağa davam edir. EDnews xəbər verir ki, İran İslam Respublikasının Xarici İşlər Nazirliyi bu əlamətdar gün münasibətilə Azərbaycan xalqına və hökumətinə təbrik ünvanlayıb.

Nazirliyin açıqlamasında qeyd olunur:

“İran İslam Respublikası dost və qonşu ölkə olan Azərbaycan Respublikasının xalqını və hökumətini Müstəqillik Günü münasibətilə təbrik edir, bu ölkəyə yüksəliş və firavanlıq, iki xalq arasında əlaqələrin daima yüksəlişini arzulayır.”
Rəsmi Tehran bu bəyanatla Azərbaycanla münasibətlərin dostluq və mehriban qonşuluq prinsipləri üzərində qurulmasına sadiq olduğunu bir daha ifadə edib. Açıqlamada həmçinin, gələcəkdə ikitərəfli əməkdaşlığın daha da dərinləşəcəyinə ümid bəsləndiyi vurğulanır.

Bu cür təbriklər regionda diplomatik əlaqələrin önəmini bir daha gündəmə gətirir və Azərbaycanla İran arasında son dövrlərdə müşahidə olunan siyasi dialoqun davamlılığı baxımından əhəmiyyətli siqnal kimi qiymətləndirilir.

Fatima Şükürova // EDnews