Rusiyanın Cənubi Qafqazdakı ambisiyalarının əsas hissəsi İrana quru nəqliyyat marşrutlarını bərpa etməkdir. Söhbət Zəngəzur dəhlizindən gedir. Beləliklə, Ermənistanın cənubundan keçməklə Azərbaycan, İran və Türkiyəni birləşdirən, Naxçıvana quru əlaqəni yaradan xətt formalaşır. 

Zəngəzur dəhlizini açılması nələri dəyişdirəcək? Rusiyanın burada məqsədi nədir?

Mövzu ilə bağlı siyasi şərhçi Fikrət Sadıqov Ednews-a açıqlamasında bildirdi ki, gec-tez Zəngəzur dəhlizi açılmalıdır. İlk növbədə bu Azərbaycanın maraqlarına cavab verir:

“Çünki Azərbaycanın əsas hissəsi Naxçıvanla birləşməlidir. 2020-ci ildə Ermənistan üçtərəfli bəyanat imzalayanda bu öhdəliyi üzərinə götürüb və bu yerinə yetirilməlidir. O ki, qaldı Rusiya və İrana, dəhliz layihəsi onları da qane edən məsələdir. Bu layihəni onlar daha iri miqyaslı layihə kimi istifadə edə bilərlər. Amma iş orasındadır ki, Rusiyanın müəyyən ambisiyaları, şərtləri var. Rusiya Zəngəzur dəhlizinin qorunmasına çalışır və öz rolunu qabartmaq istəyindədir. Rusiya istəyir ki, dəhlizə nəzarət etsin. Onlar bu regionda nəzarəti itirməkdən çox narahatdır. Digər tərəfdən İran bəyanatla çıxış edərkən deyirdi ki, Zəngəzur dəhlizi İranla Ermənistan arasında müəyyən çətinliklər törədəcək, sərhəd pozulacaq,  Ermənistanla birbaşa münasibət qura bilməyəcklər və.s. Son zamanlar onların mövqeyi mülayimləşdi. Bu o demək deyil ki, onlar layihəyə tam da razıdırlar, ancaq görünür müəyyən şərtlər var. Onlar da bizdən müəyyən şərtləri gözləyirlər. Çünki İran çoxdan bizim qərblə yaxınlaşma məsələsinə, İsraillə də olan yaxın əlaqələrə qısqanclıqla yanaşır. Diplomatik müstəvidə bu məsələləri həll etmək olar”.

Oğuz