Ermənistanda keçirilmiş parlament seçkilərindən sonra regionda yaranmış yeni siyasi vəziyyət və bunun Rusiya–Ermənistan münasibətlərinə mümkün təsirləri müzakirə olunmaqda davam edir. Xüsusilə Moskvanın formalaşmış nəticələrə münasibəti və gələcək əməkdaşlıq formatının necə dəyişə biləcəyi diqqət mərkəzində saxlanılır.
Rusiyalı siyasətçi və jurnalist Aleksey Naumov EDnews-a müsahibəsində qeyd edib ki, Rusiyanın seçkilərin nəticələrini tanımaması ilə bağlı sual iki ölkə arasındakı münasibətlərin mahiyyətini daha aydın anlamağa imkan verir.
— Əgər Rusiya Ermənistanda keçirilmiş parlament seçkilərinin nəticələrini tanımasa, bu, Moskva və İrəvan arasındakı münasibətləri hansı mərhələyə gətirə bilər?
— Əslində, Rusiyanın Ermənistan seçkilərinin nəticələrini tanımamasını təsəvvür etmək olduqca çətindir. Hazırda səsverməyə təzyiq edilməsi və büdcə təşkilatlarında çalışanların, eləcə də onların ailə üzvlərinin səsvermə barədə hesabat verməyə məcbur edilməsi ilə bağlı çoxsaylı iddialar var .
Ümumilikdə aydındır ki, Ermənistanda siyasi reallıq artıq formalaşıb və sabit xarakter alıb, bu prosesə dair kənar qiymətləndirmələr isə mövcud hakimiyyət sisteminin fəaliyyət faktını dəyişmir. Buna görə də Rusiya, ehtimal ki, İrəvanla münasibətlərini məhz bu siyasi reallıqdan çıxış edərək quracaq.
Belə olan halda söhbət kəskin qarşıdurma və ya böhrandan yox, münasibətlərin tədricən tənzimlənməsindən gedə bilər. İlk növbədə bu, iqtisadi güzəştlərin — subsidiyalar, güzəştli rejimlər və qiymət mexanizmlərinin azaldılması şəklində özünü göstərə bilər ki, bunlar əvvəllər ölkələr arasında daha sıx əlaqəni təmin edirdi.
Bundan əlavə, Moskvanın Ermənistan rəhbərliyinə qarşı daha çox yumşaq və sistemli xarakter daşıyan siyasi-diplomatik təsir alətlərindən istifadə etməsi də mümkündür. Bu yanaşma iki ölkə arasındakı münasibətlərdə “icazə verilən çərçivələrin” müəyyənləşdirilməsinə və Rusiyanın təhlükəsizlik maraqlarına zidd hesab edilən addımların məhdudlaşdırılmasına yönələ bilər.
Ümumilikdə isə belə bir ssenariyə böhran deyil, münasibətlərin formatının yenidən qiymətləndirilməsi demək olar. Rusiya, ehtimal ki, daha praqmatik və əvvəlki kimi geniş güzəştlərə əsaslanmayan bir model çərçivəsində, regiondakı yeni siyasi reallıqlar və öz maraqlarından çıxış edərək Ermənistanla əməkdaşlığı davam etdirəcək.
Fatimə Şükürova | EDnews
