ABŞ prezidenti administrasiyasının əməkdaşları Donald Trampın adından səhvən onun keçmiş milli təhlükəsizlik üzrə köməkçisi Herbert Makmasterə zəng ediblər. Halbuki dövlət başçısı bundan cəmi bir gün əvvəl özünün "Truth Social" hesabından onu Vaşinqtonun Moskvaya qarşı siyasətinə mənfi münasibətinə görə sərt tənqid etmişdi və keçmiş köməkçisini "zəif, tamamilə səmərəsiz, uğursuz biri" adlandırmışdı.

“EDnews” xəbər verir ki, hadisə martın 3-də baş verib. Trampın müşaviri kimi 13 ay işləmiş Makmasterə Ağ Evdən zəng edilib və prezidentin onunla danışmaq istədiyi bildirilib. Söhbətə "Henri" sözləri ilə başlayan Tramp dərhal anlayıb ki, xəttin o biri tərəfində heç də zəng etmək istədiyi şəxs deyil.

"Cənab prezident, bu Eyç Ar (Herbert Raymond adının qısaltması - red.) Makmasterdir", - deyə keçmiş müşavir özünü təqdim edib.

Qıcıqlanmış Tramp isə əsəblə - "Mən niyə Eyç Ar Makmasterlə danışmalıyam?" - deyib və bundan sonra keçmiş köməkçisinə qarşı acı tirada ilə çıxış edib.

Sonradan məlum olub ki, əslində prezident Cənubi Karolina ştatının qubernatoru Henri Makmasterlə əlaqə saxlamaq istəyirmiş, lakin onun köməkçilərindən biri nömrələri qarışdıraraq keçmiş müşavirə zəng edib.

Qeyd edək ki, bundan cəmi bir neçə gün əvvəl "The Atlantic" jurnalının baş redaktoru Ceffri Qoldberq gözlənilmədən Mayk Uoltz - Trampın hazırkı milli təhlükəsizlik üzrə köməkçisi - ləqəbi ilə istifadəçidən təhlükəsiz "Signal" mesencerinə qoşulmaq üçün sorğu alıb. Bir neçə gün sonra isə jurnalist ABŞ administrasiyasının üzvlərinin Yəmənə zərbələri müzakirə etdiyi qapalı qrup çatına əlavə edilib.