İsrail ordusu HƏMAS-ın jurnalist adı altında gizlənən döyüşçüsünü zərərsizləşdirib.  

"EDnews"xəbər verir ki, İsrail Müdafiə Qüvvələri (SAXAL) və Ümumi Təhlükəsizlik Xidmətinin (ŞABAK) birgə əməliyyatı nəticəsində "Al Jazeera" jurnalisti kimi təqdim olunan "Beyt-Hanun" batalyonunun snayperi Hossam Bazel Abdul Karim Şabat məhv edilib.  

İsrailin təhlükəsizlik orqanları Şabatın HƏMAS-ın hərbi qanadı ilə əlaqəsini ifşa edərək, onun 2019-cu ildə "Beyt-Hanun" batalyonunun hərbi təlimlərində iştirak etdiyini sübut edən sənədlər yayımlayıb. Bildirilir ki, o, İsrail hərbçiləri və mülki vətəndaşlarına qarşı terror aktları törədib.  

Xatırladaq ki, martın 18-də İsrail ordusu Qəzza zolağında hərbi əməliyyatları bərpa edərək, yanvarda razılaşdırılmış atəşkəsi pozub. Baş nazir Benyamin Netanyahunun ofisi bunu HƏMAS-ın vasitəçilər və ABŞ prezidentinin xüsusi nümayəndəsi Stiven Uitkoff tərəfindən irəli sürülən təklifləri qəbul etməməsi ilə əsaslandırıb. İsrail hakimiyyəti hərbi əməliyyatların məqsədinin girovların azad edilməsi olduğunu bəyan edib. HƏMAS isə döyüşlərin yenidən başlamasına görə məsuliyyəti İsrail və ABŞ-nin daşıdığını bildirib.

Şəms Qasımlı // EDnews