"Bu, jurnalistika prinsiplərinin pozulmasıdır. Digər tərəfdən, məsələ təkcə jurnalistika qaydaları ilə də məhdudlaşmır, bu, ümumilikdə etik davranış normalarına ziddir. Hər hansı bir dövlətə qarşı ciddi, əsassız ittiham irəli sürmək, bunu heç bir sübut olmadan təqdim etmək yolverilməzdir".

Bu fikirləri Siyasi və Hüquqi Araşdırmalar Mərkəzinin rəhbəri, politoloq Xəyal Bəşirov “CNN World” xəbər kanalının internet səhifəsində dərc olunan məqalədə Azərbaycanla bağlı yer alan iddialar haqda EDnews-a danışarkən bildirib.  

O, bildirib ki, bəzən İran tərəfindən də bu cür fikirlər səsləndirilirdi. Həmin fikirlər ya müəyyən dairələr, ya da İranda ciddi söz sahibi olmayan şəxslər tərəfindən irəli sürülürdü və biz də onlara cavab verirdik:

"Lakin CNN kimi məsələlərə neytral yanaşmalı, şəffaf və ədalətli informasiya yaymaq öhdəliyi olan media qurumunun belə iddialar səsləndirməsi onu göstərir ki, bu gün dünyada təkcə beynəlxalq hüququn işləmədiyini deyil, həm də etik davranış qaydalarının və prinsiplərinin pozulduğunu görürük. Azərbaycan bu məsələlərlə bağlı mövqeyini hər zaman açıq şəkildə bildirib. Baxmayaraq ki, İrandan Azərbaycana qarşı müxtəlif fikirlər səsləndirilib, hətta İkinci Qarabağ müharibəsi dövründə və ondan sonra bəzi xoşagəlməz hallar yaşanıb, Azərbaycan Prezidenti və Azərbaycan dövləti buna münasibətini bildirib, sərt reaksiyasını ortaya qoyub. Bununla belə, ölkəmiz bütün dövlətlərə, o cümlədən qonşu ölkələrə münasibətdə ərazi bütövlüyünün və suverenliyin toxunulmazlığından yana olub".

Politoloq vurğulayıb ki, İrana qarşı edilən müdaxilə ilə bağlı da Azərbaycanın mövqeyi açıq və birmənalı olub:

"Biz hesab edirik ki, heç bir dövlətin, o cümlədən İranın ərazi bütövlüyü bu cür təhlükələrlə üz-üzə qalmamalıdır. Azərbaycanın Rusiya-Ukrayna müharibəsindəki mövqeyi də eyni prinsipə əsaslanır. Biz bütün dövlətlərə və bütün proseslərə münasibətdə ərazi bütövlüyü prinsipini əsas götürürük. Əgər Azərbaycanı bu cür məsələdə ittiham edirlərsə, o zaman sübut ortaya qoymalıdırlar. Ötən ilin iyun ayında 12 günlük müharibə oldu. Həmin dövrdə də bəzi fikirlər səsləndirilirdi ki, guya hücumların bir qismi Azərbaycan ərazisindən həyata keçirilib və ölkəmiz İsrail kəşfiyyatçıları hazırlanaraq İrana göndərilib. Lakin bu iddialarla bağlı heç bir sübut təqdim olunmadı".

Xəyal Bəşirov onu da əlavə edib ki, əgər ortada hər hansı sübut olsaydı, İran özü bu məsələ ilə bağlı faktlar təqdim edər, bütün dünyaya göstərərdi ki, hücumlar Azərbaycan ərazisindən təşkil olunub. Əgər belə sübut yoxdursa, deməli, bunlar cəfəng, əsassız və ciddi qəbul olunmayan iddialardır: 

"CNN-in bu gün dünyada mövqeyinin zəifləməsi, informasiya siyasətinə etimadın azalması da məhz belə hallarla bağlıdır. Bəzən gündəmə gəlmək üçün hər hansı mövzu ortaya atılır. Xüsusilə Azərbaycanla bağlı bu cür əsassız iddiaların səsləndirilməsi onlara sadəcə qısa müddətlik gündəmə gəlmək imkanı verir. Bu baxımdan, Azərbaycan bu iddialara lazımi cavabı verir, amma onlara həddindən artıq ciddi yanaşmağa da ehtiyac yoxdur. Hər halda, əgər ortada əsaslı fakt olsaydı, düşünürəm ki, aidiyyəti tərəflər bununla bağlı lazımi addımları atardılar".

Xatırladaq ki, 5 iyun tarixində “CNN World” xəbər kanalının internet səhifəsində dərc olunan məqalədə Azərbaycan ərazisinin guya İrana qarşı hərbi və ya kəşfiyyat əməliyyatları üçün istifadə edilməsi, həmçinin İsrailə məxsus qüvvələrin Azərbaycan ərazisində yerləşdirilməsi barədə əsassız iddialar əks olunub. Məsələ ilə bağlı Azərbaycan Xarici İşlər Nazirliyindən (XİN) bildirilib ki, Azərbaycan ərazisinin guya İrana qarşı hərbi və ya kəşfiyyat əməliyyatları üçün istifadə edilməsi barədə iddialar əsassızdır. Azərbaycan tərəfi CNN-dən əsassız iddiaların yer aldığı məqalənin təkzib edilməsini gözləyir.

Aytac Kərimova | EDnews