.png)
Ukrayna Prezidenti Volodimir Zelenski Rusiya Prezidenti Vladimir Putinə açıq məktub ünvanlayaraq müharibənin dayandırılması və birbaşa danışıqlara başlanması çağırışı edib.
EDnews "RBK-Ukrayna"ya istinadən xəbər verir ki, məktubda Zelenski Rusiyanın bu il Donbası tam ələ keçirə bilməyəcəyini bildirib və Putini müharibəni dayandıraraq danışıqlar masasına oturmağa çağırıb.
Ukrayna lideri qeyd edib ki, Kiyev danışıqlar müddətində atəşkəsə hazırdır və tərəflərin mövcud təmas xətti boyunca mövqelərində qalmasını təklif edir.
Zelenski məktubunda Rusiyada 26 illik hakimiyyət dövründə iki ölkə arasında münasibətlərin ticarət və əməkdaşlıqdan müharibə mərhələsinə keçdiyini vurğulayıb. Onun sözlərinə görə, bu müharibə Rusiya üçün də ciddi yükə çevrilib: ölkədə qiymətlər artır, resurslar tükənir, səfərbərlik davam edir və münaqişənin sonu görünmür.
Ukrayna Prezidenti həmçinin Rusiyanın cəbhədə böyük itkilər verdiyini, Moskvanın isə qərar qəbuletmədə getdikcə daha çox Şimali Koreya və Çindən asılı vəziyyətə düşdüyünü iddia edib.
Məktubda Kiyev müharibənin ədalətli şəkildə başa çatdırılmasını təklif edir. Zelenski danışıqların neytral ərazidə - İsveçrə, Türkiyə və ya ərəb ölkələrindən birində keçirilməsini mümkün hesab edir.
Onun fikrincə, prosesdə ABŞ və Avropa tərəfdaşları zəmanətçi qismində iştirak etməlidir.
Ukrayna tərəfi dialoqa başlamaq üçün bir neçə əsas addım atılmasını təklif edib. Bunlara liderlərin görüşü üçün konkret tarix müəyyənləşdirilməsi, danışıqlar müddətində tam atəşkəsin elan olunması, bu razılaşmaya ABŞ tərəfindən nəzarət edilməsi, hərbi əsirlərin “hamının hamıya” prinsipi ilə dəyişdirilməsi, həmçinin təxliyə edilmiş mülki şəxslərin və uşaqların geri qaytarılması daxildir.
Ukraynanın xarici işlər naziri Andrey Sibiqa məktubun bütün diplomatik kanallar vasitəsilə Rusiyaya çatdırılacağını bildirib.
Zelenskinin komandasında isə qeyd edilib ki, məktub təkcə Kremlə deyil, Rusiyada təsir imkanlarına malik qruplara, eləcə də ABŞ və digər tərəfdaşlara da siyasi mesaj xarakteri daşıyır.
Kreml məktuba artıq ilkin reaksiya verib. Rusiya Prezidentinin mətbuat katibi Dmitri Peskov məktubdan xəbərdar olduğunu bildirib və əlavə edib ki, Vladimir Putinə bu barədə məlumat veriləcək. Bununla yanaşı, Peskov Moskvanın əvvəlki mövqeyini təkrarlayaraq bildirib ki, Zelenski danışıqlar istəyirsə, Moskvaya gəlməlidir.
Putin məktuba şəxsən cavab verməsə də, son açıqlamalarında Ukraynadakı müharibə ilə bağlı müxtəlif mesajlar verib. O, bir tərəfdən yeni təhdidlər səsləndirib, digər tərəfdən isə “kompromislərə” hazır olduğunu bildirib. Bununla belə, Rusiya lideri Donbasla bağlı mövqeyindən geri çəkilmədiyini də nümayiş etdirib.
ABŞ Prezidenti Donald Tramp da Zelenskinin Putinə məktubunu şərh edib. O, tərəflərin mümkün görüşü müzakirə etməsindən məmnun olduğunu deyib və Vaşinqtonun bunun baş tutması üçün ciddi iş apardığını bildirib.
“Düşünürəm ki, onlar görüşsəydilər, bu, çox yaxşı olardı”, - Tramp Ağ Evdə jurnalistlərə açıqlamasında deyib.
ABŞ Prezidenti Rusiya və Ukraynanı “gözəl ölkələr” adlandırıb, həm Putin, həm də Zelenskinin “çox yaxşı insanlar” olduğunu söyləyib. Tramp həmçinin Ukraynadakı müharibədə hər ay minlərlə insanın həlak olduğunu qeyd edərək tərəflərin müəyyən kompromislərə gedəcəyinə və münaqişənin sona çatacağına ümid etdiyini bildirib.
Bununla yanaşı, Amerika lideri ABŞ yardımı olmasaydı, Ukraynanın uzun müddət müqavimət göstərə bilməyəcəyini iddia edib.
Aytac Kərimova | EDnews
