Bir çox dövlətlərdə olduğu kimi, son vaxtlar Azərbaycanda da zorlama hadisələrinin sayının artdığı bildirilir. Məsələnin pis olan bir tərəfi də ondan ibarətdir ki, zorlamaya qadınlarla yanaşı, azyaşlı qız və oğlanlar da məruz qalırlar.
Bunun qarşısını almaq üçün nə kimi tədbirlər görülməlidir? Niyə Azərbaycanda bu cür hadisələr çoxalıb?
Bu barədə Ednews-a sosioloq Lalə Mehralı bildirdib ki, əsrimiz texnologiya, inkişaf, kosmos əsri adlandırılır, amma yaşadığımız əsr bir az da təcavüzçülərin əsri hesab edilir. Təcavüz edənlər - pedofillər cəmiyyətdə əlini-qolunu yelləyərək sərbəst gəzdiyini isə çoxumuz bilirik. Ya şikayət olunmurlar, ya da çox az cəza ilə qurtulurlar:
“Cəmiyyətin özü də ailə-məişət zorakılığına qarşı o qədər də mənfi rəy bəsləmir. Əksəriyyət yalnız müzakirələr zamanı bunun dorğu davranış olmadığını deyir, amma heç kim bunu əməldə hiss etdirmir. Öldürülən, döyülən, təcavüz olunan fərd haqqında deyirlər ki, yəqin öz günahıdır, heç kim boşuna döyülməz, filan yerdə neynirdi ki, zorlanırdı. Bununla da zorakılığın həyata keçirilməsinə bəribaşdan bəraət qazandırırlar”.
Sosioloqun sözlərinə görə, təcüvüz edilənlər də, təcavüz edənlər də bizdəndir. Bizim içimizdən çıxıb o vəhşiliyi törədənlər:
“Onlar kimi neçə potensial təcavüzçü var içimizdə, bilmək olmaz. Etirazımız azdır. İnsanların uşağa təcavüz edənə səsləri çıxmır, amma heyvan haqları üçün az qalırlar bir-birlərini öldürsün. İctimai qınaq çox olmalıdır, təcavüzçülər həbsxanadan sonra da onları normal həyat gözləmədiyini anlamalıdırlar.
Güclü cəmiyyət zorakılığa qarşı mübarizə etməlidir. İnkişaf etmiş ölkələrdə də ailə zorakılığı, təcavüz halları mövcuddur. Amma orada birmənalı olaraq cəmiyyət də, dövlət də bununla mübarizə aparır. Bizim cəmiyyətdən çox qanunun həyata keçirilməsində problemlər var”.
Oğuz