Baş Prokurorluğun İstintaq İdarəsinin Dövlət Gömrük Komitəsinin Hava Nəqliyyatında Baş Gömrük İdarəsində keçirdiyi əməliyyatın detalları məlum olub.
EDnews xəbər verir ki, bu barədə “Qafqazinfo” məlumat yayıb.
Məlumata görə, əməliyyata səbəb xüsusilə külli miqdarda qızıl-zinət əşyalarının qaçaqmalçılıq yolu ilə ölkəyə keçirilməsinə cəhd edilməsi olub.
Bildirilib ki, əvvəlcədən cinayət niyyəti ilə əlbir olan bir qrup şəxs hava nəqliyyatı vasitəsilə ölkəyə milyonlarla manat dəyərində qızıl-zinət əşyaları keçirməyə çalışıb.
İddiaya əsasən, Hava Nəqliyyatında Baş Gömrük İdarəsinin növbə rəisinin müavini İsmayıl Əliyev qaçaqmalçılıq əməlində həmin şəxslərə şərait yaradıb.
Faktla bağlı Baş Prokurorluğun İstintaq İdarəsi tərəfindən Cinayət Məcəlləsinin 206.4-cü maddəsi — mütəşəkkil dəstə halında külli miqdarda qaçaqmalçılıq üzrə cinayət işi başlanıb.
Məlumata görə, İsmayıl Əliyev həmin maddə ilə ittiham edilərək həbs edilib.
Cinayət işi üzrə idarənin digər əməkdaşları, o cümlədən qadın əməkdaşlar da sorğu-sual edilib, bəziləri istintaqa cəlb olunub.
Hazırda faktla bağlı geniş ibtidai istintaq hərəkətləri davam etdirilir.
Qeyd edək ki, Dövlət Gömrük Komitəsinin Hava Nəqliyyatında Baş Gömrük İdarəsinin rəisi general-mayor Anar Cahangirovdur. Hələlik qurumdan hadisə ilə bağlı rəsmi açıqlama verilməyib.
