Əksər abituriyentlər ixtisas seçimi üçün mütəxəssislərə müraciət edirlər.
Təhsil eksperti Cahid İmanlı bu barədə EDnews-a danışıb.
Onun sözlərinə görə, təhsil mütəxəssisi seçərkən onun ilk növbədə, təcrübəsinin olub-olmaması ilə maraqlanmaq lazımdır:
“Artıq on illərdir ki, sosial şəbəkələr mövcuddur. Əgər bir təhsil eksperti ixtisas seçimi etdiyini deyirsə, mütləq onun sosial hesablarında bu haqda məlumatlar və rəylər olmalıdır. Digər bir göstərici isə şəxsin mütəmadi olaraq kütləvi informasiya vasitələrində çıxışlarının olmasıdır”.
Cahid İmanlı qeyd edib ki, hazırda bu sahə üzrə “yağışdan sonra çıxan göbələklər kimi” onlarla “ekspert”lər çıxıb:
“Onların özlərinə uşaq cəlb etmə yolları, əsasən, TikTok üzərindən canlı yayım açmaları və ya bir çox hallarda abituriyentləri qorxudan və ya cəlb edən, heç bir əsası olmayan, amma ajiotaj yaradan məlumatlar paylaşmasıdır. Məsələn, “ballar qalxacaq”, “30 balla universitetə qəbul”, “0 balla qəbul” kimi reklam xarakterli məlumatlar paylaşmaqla hansısa abituriyentləri ‘tora’ salmağı hədəfləyən ucuz ekspertlər çoxdur”.
Təhsil ekspertinin fikrincə, abituriyentlər düzgün seçim etməlidir:
“Abituriyentlərə tövsiyəm odur ki, kifayət qədər tanınan, ən azından üzlərini televiziyada bir dəfə gördükləri ixtisas mütəxəssislərinə müraciət etsinlər”.
Qeyd edək ki, ixtisas seçimi abituriyentin gələcək təhsil və karyerası üçün həlledici əhəmiyyət kəsb edir və düzgün mütəxəssis seçimi bu prosesin uğurunda vacib rol oynayır.
Səyad Qoşnalıyeva | EDnews
.png)
.jpg)
.jpg)
