Avropa Komissiyası 2023-cü ildə qəbul edilmiş süni intellekt (Al) qanununa uyğun olaraq süni intellektin istifadəsini məhdudlaşdırmaq üçün yeni təlimatlar hazırlayır. ABŞ-ın təzyiqlərinə baxmayaraq, Avropa İttifaqı iri süni intellekt modelləri və yüksək riskli tətbiqlər üçün sərt qaydalar tətbiq etməyə davam edir.

"EDnyus" xəbər verir ki, bu barədə "Financial Times" yazır.

Bazar günü internetdən məlumat toplayaraq üz tanıma bazaları yaratmaq kimi bəzi Al tətbiqlərini qadağan edən müddəalar qüvvəyə minib.

Fevralın 4-də, çərşənbə axşamı Avropa Komissiyası şirkətlər üçün ətraflı göstərişlər dərc edəcək, qanunun digər müddəaları isə mərhələli şəkildə 2027-ci ilə qədər qüvvəyə minəcək. Ən güclü Al modelləri əlavə tələblərə cavab verməli olacaq və qaydaları pozanlara böyük cərimələr və ya Aİ bazarında qadağalar tətbiq ediləcək.

Bu arada Donald Tramp Avropanın sərt tənzimləmə siyasətinə cavab tədbirləri görməklə hədələyir, çünki bu qaydalar amerikalı texnologiya nəhənglərini birbaşa hədəfə alır. O, Aİ-nin bu addımlarını ABŞ şirkətləri üçün "vergi qoyma forması" kimi qiymətləndirib.

Bildirilir ki, Brüssel artıq Apple, Meta və Google-un fəaliyyətinə nəzarəti genişləndirərək Avropa rəqəmsal bazarlarının tənzimlənməsinə yönəlmiş daha geniş təşəbbüsləri nəzərdən keçirir.

Böyük texnologiya şirkətləri, o cümlədən Meta, yeni qaydaların innovasiyaları məhdudlaşdıra biləcəyi ilə bağlı xəbərdarlıq edir. Bununla yanaşı, startaplar və açıq mənbəli proqram təminatı inkişaf etdiriciləri üçün müəyyən istisnalar nəzərdə tutulub.

Avropa Komissiyası tənzimləmə və innovasiyaların təşviqi arasında balans tapmağa çalışdığını bildirib.

Xatırladaq ki, Çinin DeepSeek startapı süni intellekt sahəsində daha əlçatan həllər təklif edir və açıq mənbə kodundan istifadə edərək qlobal Al bazarına əhəmiyyətli təsir göstərə bilər.