"Süni intellekt insanın düşünmə, problem həll etmə və qərarvermə qabiliyyətlərinin texnologiyaya əks olunmasıdır. Süni intellekt cari vəziyyətdə sadəcə texnologiya kimi görünsə də, gələcəkdə qlobal miqyasda güc balansını dəyişdirə biləcək mühüm vasitəyə çevriləcək".
Bu sözləri "EDnyus"-a açıqlamasında İnformasiya Texnologiyalar İnstitutunun əməkdaşı, ekspert Araz Mustafa deyib.
Onun sözlərinə görə, süni intellektin inkişafı artıq hərbi, iqtisadiyyat, mətbuat və s. sahələrdə də ciddi təsirini göstərməkdədir. O qeyd edib ki, xüsusilə hərbi sahədə süni intellektə əsaslanan sistemlər inkişaf edir, yeni silahlar və müdafiə sistemləri yaradılır.
"İqtisadiyyatda da süni intellektin təsirləri görünməkdədir. Artıq iqtisadi inkişafın əsas aparıcı qüvvələrindən birinə çevrilir. Süni intellekt texnologiyaları iri həcmli məlumatları analiz edərək data analitikası vasitəsilə iqtisadi proqnozlar verməyə və bazarı daha dəqiq təhlil etməyə imkan yaradır ki, bu da dövlətlərə daha effektiv qərarlar qəbul etməyə, resursları optimal bölüşdürməyə və riskləri öncədən görməyə kömək edir.
Süni intellektin biznes və maliyyə sektorlarında da tətbiqi bankçılıqdan sığortaya, investisiya idarəçiliyindən ticarətə qədər geniş bir spektrı əhatə edir. Məsələn, süni intellekt əsaslı alqoritmlər bazar tendensiyalarını analiz edərək, investisiya strategiyalarını optimallaşdıra və davranışlarını proqnozlaşdıraraq, daha uyğun strateji hədəflər qoymağa kömək edə bilər, - deyə o əlavə edib.
A.Mustafa bildirib ki, göstərilən məsələrlə yanaşı, süni intellekt səhiyyədə, xüsusən də xəstəliklərin erkən diaqnozu üçün istifadə edilə bilər.
"Bu isə dövlətlərə vətəndaşlarının həm sağlamlıq, həm də maliyyə baxımından xərclərini azaltmağa kömək edəcək.
Bunlardan əlavə kənd təsərrüfatı, nəqliyyat, kibertəhlükəsizlik sahələrində, ağıllı evlər, eyni zamanda ağıllı şəhər və ağıllı kənd kimi kompleks layihələrdə süni intellekt texnologiyalarının tətbiqi proseslərin real vaxt rejimində qərarvermə və avtomatlaşdırılmanı sürətləndirməyə və məhsuldarlığı artırmağa imkan verir", - deyə o bildirib.
A.Mustafa onu da qeyd edib ki, yuxarıda sadalanan məsələlər də daxil olmaqla süni intellektin bir çox üstünlükləri dövlətlərin bu sahəyə olan marağını daha da artırır.
"Eyni zamanda, süni intellekt texnologiyasının inkişafına daha çox dəstək verir və gələcəkdə daha çox texnoloji üstünlüyə malik olmaq istəyir.
Azərbaycanda müxtəlif elm və təhsil ocaqlarında, xüsusən də İnformasiya Texnologiyaları İnstitutunda süni intellekt sahəsində müxtəlif elmi araşdırmalar aparılır. Süni intellekt texnologiyalarının tətbiqinə dövlətimiz tərəfindən də xüsusi diqqət ayrılır. Heç də təsadüfi deyil ki, “Digital Almaty 2025” forumda iştirak edən Azərbaycan nümayəndələri tərəfindən Azərbaycanda hal-hazırda süni intellekt strategiyasının hazırlandığı bildirilmişdir. Eyni zamanda Rəqəmsal İnkişaf və Nəqliyyat Nazirliyi tərəfindən “Süni İntellekt Laboratoriyası” yaradılıb. Azərbaycanın rəqəmsal transformasiyasını sürətləndirmək üçün atdığı addımlar eyni zamanda süni intellektin ölkəmizdə geniş tətbiqini təmin edəcək və onun müxtəlif sahələrdə effektiv istifadəsinə imkan yaradacaqdır", - deyə o, fikirlərini yekunlaşdırıb.
