Almaniya xarici işlər naziri Annalena Berbok İsraillə HƏMAS arasında əldə edilən atəşkəsi alqışlayıb və girovların, o cümlədən Almaniya vətəndaşlarının girovluqdan azad olunaraq evlərinə qaytarılacağına ümid etdiyini ifadə edib.
"EDnyus" xəbər verir ki, bu barədə Almaniya Xarici İşlər Nazirliyinin dərc etdiyi bəyanatda bildirilib.
O, İsraillə HƏMAS arasında atəşkəsin elan olunduğu günü "rahatlıq" kimi xarakterizə edib.
"Rahatlıq hissi var ki, artıq bütün tərəflərin çəkdiyi əzablar sona çata bilər. İsraillə HƏMAS arasında girovların azad olunması və atəşkəs barədə əldə edilən razılaşma təkcə insanların həyatını xilas etmir, eyni zamanda 15 aydan sonra Qəzza sakinlərinə, girov və onların ailələrinə, həmçinin regiondakı bütün insanlara ümid verir", deyə o qeyd edib.
Berbok vurğulayıb ki, fikri "HƏMAS-ın 467 gün ərzində inanılmaz əzab verdiyi" Almaniya vətəndaşlarının yanındadır.
"Mən ürəkdən ümid edirəm ki, onlar çox tezliklə ailələrinə qovuşa biləcəklər", deyə Almaniya xarici işlər naziri bildirib.
O, həmçinin diqqətə çatdırıb ki, girovlar tez bir zamanda və razılaşmaya uyğun olaraq azad edilməlidir.
"Həmçinin, qoşunların çıxarılması və fələstinlilərin öz evlərinə qayıtması təmin olunmalıdır", deyə Berbok əlavə edib.
Onun sözlərinə görə, Almaniya BMT təşkilatlarına bölgədə hərtərəfli dəstək göstərməyə davam edəcək.
Daha əvvəl Amerika KİV-ləri mənbələrə istinadən bildirib ki, İsrail və HƏMAS Qəzzada hərbi əməliyyatların dayandırılması və israilli girovların fələstinli məhbuslara dəyişdirilməsi barədə razılığa gəliblər.
Razılaşma barədə hələ rəsmi təsdiq verilməmişdən öncə ABŞ-ın seçilmiş prezidenti Donald Tramp onu şərh edib və noyabr 2024-cü il seçkisində qələbəsi olmasaydı, razılaşmanın mümkün olmayacağını qeyd edib.
Eyni zamanda, İsrail Baş nazirinin ofisi bildirib ki, vasitəçilər hələ də razılaşmanın ayrı-ayrı məqamları üzərində işləyirlər, lakin prosesi yaxın saatlarda başa çatdıracaqlarına ümid edirlər.
Aralıq dənizi üzrə Avropa komissarı Dubravka Şuitsa İsraillə HƏMAS arasında atəşkəsin və girovların azad olunması ilə bağlı razılaşmanı alqışlayıb.
Daha sonra ABŞ prezidenti Co Bayden HƏMAS terrorçuları ilə İsrail arasında atəşkəs və girovların azad olunması barədə razılaşmanın əldə edildiyini təsdiqləyib.
