Birinci Türkoloji Qurultayın 100 illiyinə həsr olunmuş tədbirdə çıxış edən Xalq şairi və ictimai xadim Sabir Rüstəmxanlı türkologiyanın keçmişi, bu günü və gələcək perspektivləri ilə bağlı fikirlərini bölüşüb.
O, EDnews-a bildirib ki, Birinci Türkoloji Qurultay yalnız elmi hadisə deyil, həm də türk xalqlarının ortaq düşüncə və mədəni yaddaşının formalaşmasında mühüm rol oynayan tarixi mərhələ olub.
Rüstəmxanlı qeyd edib ki, həmin dövrün bir çox görkəmli nümayəndələrinin sonradan repressiyalara məruz qalması tariximizin ağrılı səhifələrindən biri kimi yadda qalıb.
Bununla yanaşı, bu gün eyni ideyaların yenidən gündəmə gəlməsi və müxtəlif ölkələrdən alimlərin bir araya gəlməsi xüsusi əhəmiyyət daşıyır.
Çıxış zamanı o vurğulayıb ki, müasir mərhələdə türkologiya yalnız dil və ədəbiyyatla məhdudlaşmamalı, tarix, etnoqrafiya, coğrafiya, mədəniyyət və ictimai inkişaf proseslərini də özündə birləşdirən geniş elmi istiqamət kimi inkişaf etməlidir.
Xalq şairi həmçinin qeyd edib ki, türk xalqlarının keçmişi ilə bağlı bir sıra tarixi faktlar müxtəlif dövrlərdə təhrif olunub, bəzi izlər isə məqsədli şəkildə unudulmağa məruz qalıb:
"Bu baxımdan, mövcud mənbələrin yenidən araşdırılması, ortaq elmi yanaşmanın formalaşdırılması və yeni tədqiqatların aparılması vacib hesab edilir".
Sabir Rüstəmxanlı çıxışında türk dünyasının gələcək inkişafı üçün ortaq elmi platformaların yaradılması, birgə nəşrlərin hazırlanması və ölkələrarası elmi əməkdaşlığın genişləndirilməsinin vacibliyini də diqqətə çatdırıb.
Sonda o qeyd edib ki, türk dünyasının zəngin tarixi və mədəni irsi dünya sivilizasiyasının mühüm hissəsidir və bu irsin sistemli şəkildə öyrənilməsi gələcək nəsillər qarşısında mühüm məsuliyyət olaraq qalır.
.jpg)
