“Azərbaycanın mötəbər tədbirə yüksək səviyyədə ev sahibliyi etməsi hər kəs tərəfindən yüksək qiymətləndirilir. Göstərilən qonaqpərvərliyə görə təşəkkürümüzü bildiririk”.
Qırğızıstan Respublikasının mədəniyyət, informasiya və gənclər siyasəti naziri Mirbek Mambetaliyev bunu Türk Dünyası Həftəsinin açılış mərasimində EDnews-a müsahibəsində bildirib.
“Belə möhtəşəm tədbirin təşkilinə görə Azərbaycana təşəkkür edirəm. Qırğızıstan Respublikasından akademiklərimiz, görkəmli mədəniyyət xadimlərimiz və sənət nümayəndələrimiz gəliblər. Onlar birgə konsertdə iştirak ediblər”, – deyə nazir vurğulayıb .
Mirbek Kemeloviç Türk Dövlətləri Təşkilatı və TÜRKSOY çərçivəsində mədəniyyət sahəsində əməkdaşlığın daha da genişlənəcəyinə inanır.
Nazirin sözlərinə görə, təxminən 100 il əvvəl türk xalqlarının ziyalıları vahid əlifbanın yaradılması, ərəb qrafikasından latın əlifbasına keçid istiqamətində mühüm işlər görüblər.
“Bu gün biz öz köklərimizə qayıdırıq. Türk Dövlətləri Təşkilatı çərçivəsində dövlətlərimiz gələcəyə birlikdə addımlamalıdır. İnanıram ki, bugünkü tədbir bu istiqamətdə əməkdaşlığın inkişafına mühüm təkan verəcək”, – deyə o əlavə edib.
Qeyd edək ki, Heydər Əliyev Mərkəzində Birinci Türkoloji Qurultayın 100 illiyinə həsr olunmuş “Türk Dünyası Həftəsi”nin açılış mərasimi olub.
