“Rusiyanın Xankəndidə konsulluq açmaq istəyi ilk növbədə, siyasi konyukturadan irəli gələn bir istəkdir”.
Bu fikirləri Ednews-a açıqlamasında politoloq Tofiq Abbasov Rusiyanın Xankəndidə konsulluq açmasından danışarkən deyib.
Politoloq əlavə edib ki, Rusiya bu istəyiylə demək istəyir ki, onlar Qafqaz bölgəsindən əl çəkməyəcəklər:
“Faktiki olaraq, Rusiya bu gedişlə demək istəyir ki, Qafqaz bölgəsindən heç vaxt uzaqlaşmayacaq. Çünki indi bu xarici mətbuatda bu tip fikirlər səslənir, tirajlanır. Guya ki, Rusiya Qafqazdakı mövqelərini tərk edir və onları Türkiyə əvəzləyəcək. Amma, əslində Türkiyə istəyir ki, Rusiyaya bildirisin ki, onun belə niyyətləri yoxdur. Rusiyanın başı Ukrayna müharibəsinə qarışıb, Qərblə qarşıdurmalı bir vəziyyətdir. Yeni müharibələrin meydana gəlməsi məsələsi predmeti gündəmə gəlir. Əlbəttə ki, Rusiya əgər Qafqazdan uzaqlaşarsa, onların arxayındır ki, burada Azərbaycan var. Biz heç vaxt Rusiyanı aldatmamışıq. Onlarla həmişə mərdi-mərdanə davranırıq. Digər tərəfdən, tələb edirik ki, bərabərhüquqluluq prinsipi bizim münasibətlərimizdə öz əksini tapsın. Nəhayət, Türkiyə amili də burada var.
Türkiyə də Rusiya qarşı riyakarlıq, satqınlıq nümayiş etdirməyib. Əksinə, Türkiyə belə yanaşmaların hamısını inkar edib. Odur ki, burada arxayınlıq var, həm də Rusiya istəyir ki, zəif oyun göstərdiyi halda özünün istəklərini reallaşdırsın. Formal olaraq bu istəklər onunla bağlıdır ki, Rusiyayla bizim diplomatik münasibətlərimizdə uyğunsuzluq var. Proporsiyanın pozulması müşahidə edilir. Səhv etmirəmsə, Azərbaycanın Rusiyada ən azı üç səfirlik konsulluq missiyası var. Rusiyanın isə bir dənədir, o da Bakı şəhərindədir. Amma o ki qaldı Xankəndidə konsulluq missiyasının açılmasına. Buna ehtiyac yoxdur. Çünki burada Rusiya əslli vətəndaşlar yaşamır, həmçinin Rusiyanın işgüzar dairələri orada təmsil olunmayıb. Bəlkə Qarabağın bərpa edilməsində, yenidən dirçəldilməsində Rusiyanın şirkətləri iştirak edə bilər. Onlar bütün bu ehtimalları əsas götürərək Xankəndidə konsulluq açmaq istəyirlər.
Siyasi şərhçi hesab edir ki, Rusiyanın Xankəndidə diplomatik konsulluq açmasına ehtiyac yoxdur:
“Mən hesab edirəm ki, bu cür diplomatik missiyanın açılmasına ehtiyac yoxdur. Birincisi Azərbaycan Rusiya kimi nəhəng dövlət deyil, Bakıda olan konsulluq demək olar ki, bütün ehtiyacları ödəyir. Rus əslli vətəndaşlar üçün hətta həmin vətəndaşların içində azərbaycanlılar da var, bütövlükdə hər biri üçün hər şey edilir. Azərbaycan tərəfindən Rusiyaya heç vaxt təhdid olmayıb. Güman edirik ki, bundan sonra da olmayacaq. Yaddan çıxarmayaq ki, 2022-ci ilin fevralın 22-də Rusiyada Azərbaycan Prezidenti ilə Rusiya Prezidenti müttəfiqlik bəyannaməsini imzaladılar. Bundan sonra, bu iki ölkə hətta strateji tərəfdaşlar oldular. Mən elə başa düşürəm ki, əlavə həmin elementlərin işlənməsi, gündəmə gətirilməsi ikili münasibətlərin sağlam tərzdə inkişafına qulluq etmir. Bu, sırf Rusiya diplomatiyasının şıltağlığıdır”.
Xəyal Ramiz
