ABŞ-ın dövlət katibi Marko Rubio bildirib ki, Rusiyanın Ukraynaya qarşı genişmiqyaslı müharibəsi əslində ABŞ və Rusiya arasında "marionet müharibəsi"dir.
“EDnews” xəbər verir ki, bu barədə ABŞ dövlət katibi Fox News kanalına müsahibəsində deyib.
"Açıq danışsaq, bu, iki nüvə dövləti – Ukraynaya yardım edən ABŞ və Rusiya arasında proksi-müharibədir. Buna son qoyulmalıdır", - Rubio deyib.
- Rubionun sözlərinə görə, hazırda "bu müharibəni necə bitirmək barədə heç kimin konkret planı yoxdur".
- O hesab edir ki, "Ukrayna və onun müttəfiqlərinin "onlara nə qədər lazımdırsa, o qədər verək” yanaşması strategiya deyil".
- Rubio əlavə edib ki, ABŞ-ın sabiq prezidenti Donald Tramp bu müharibəni "çıxılmaz vəziyyətə düşmüş uzunmüddətli münaqişə" kimi görürdü.
Diplomatik yanaşma:
"Biz hər kəsə açıq bildirdik ki, prezident burada sülh yolunu tapmağa çalışır. Biz həm rusları, həm də ukraynalıları masaya gətirməliyik. Biz Ukraynadan bunu sabotaj etməmələrini istəmişik. Vitse-prezident diplomatiyanın vacib olduğunu deyəndə, təəssüf ki, Zelenski ona meydan oxuyaraq ümumiyyətlə diplomatiyanın mümkün olub-olmadığını soruşdu. Amma mən sevinirəm ki, Zelenski mövqeyini yenidən nəzərdən keçirib. Bu münaqişənin həlli üçün hər iki tərəf güzəştə getməlidir, lakin əvvəlcə onları danışıqlar masasına əyləşdirməliyik. Ukraynalılar mütləq orada olmalıdırlar, çünki bu, onların ölkəsidir. Ruslar da həmin masada olmalıdırlar. Və yalnız prezident Tramp bunu mümkün edə bilər".
Ukrayna mediası qeyd edir ki, Rubio və Tramp administrasiyasının digər rəsmiləri hazırda Kremlin tezislərini təkrarlayırlar. Rusiya müharibənin əvvəlində "3 günə Kiyevi ələ keçirmək" planlaşdırsa da, buna nail ola bilməyib və tezliklə uğursuzluqlarını "NATO ilə müharibə aparmaq məcburiyyətində qaldığı" iddiası ilə izah etməyə başlayıb.
Moskva Qərbi Rusiyaya hücuma hazırlaşmaqda, NATO bazaları və bioloji laboratoriyalar qurmaqda günahlandıran yalan məlumatlar yayıb.
