Rusiya İnvestisiyalar Fondunun rəhbəri Kirill Dmitriyev ABŞ-də keçirilən genişmiqyaslı etirazların arxasında “dərin dövlət”in dayana biləcəyi ehtimalını irəli sürüb.
“EDnews” xəbər verir ki, 6 aprel tarixində “X” sosial şəbəkəsində paylaşım edən Dmitriyev bildirib ki, “Hands Off!” adı altında keçirilən aksiyaların peşəkar şəkildə hazırlanması belə bir sualı gündəmə gətirir: xarici ölkələrdə rəngli inqilablar təşkil edən dairələr indi bu taktikanı öz ölkələrində tətbiq etmək istəyirlərmi?
Xatırladaq ki, “The Guardian” nəşrinin məlumatına görə, 5 aprel tarixində ABŞ-də Prezident Donald Trampın yeni iqtisadi siyasətinə və tətbiq edilən idxal rüsumlarına qarşı böyük etiraz aksiyaları baş tutub. Narazılıq yaradan əsas məsələlər arasında sahibkar Elon Maskın dövlət idarəçiliyində rolunun artması, səhiyyəyə ayrılan büdcənin azaldılması, ekoloji proqramlara və milli parklara dəstəyin məhdudlaşdırılması yer alır.
Eyni zamanda, Avropa Parlamentində Avropa Xalq Partiyasının fraksiya rəhbəri Manfred Veber Trampın gömrük tarifləri ilə bağlı qərarlarının yeni beynəlxalq düzənə işarə etdiyini qeyd edib. O, həmçinin ABŞ-nin Avropaya qarşı münasibətində ciddi dəyişikliklərin müşahidə olunduğunu vurğulayıb.
Qeyd edək ki, 2 aprel tarixində çıxış edən Tramp ölkəyə gətirilən bütün mallara 10%-lik əsas tarif tətbiq olunacağını açıqlayıb. Avropa ölkələri üçün bu rüsum 20%, Çin üçün isə 34% səviyyəsində müəyyən olunub. Tramp həmin günü “Amerikanın yenidən varlanacağı gün” kimi xarakterizə edib
Şəms Qasımlı // EDnews
