Ötən il Gürcüstandan Azərbaycana 66 milyon dollar vəsait köçürüldüyü açıqlanıb.
EDnews xəbər verir ki, bu barədə Gürcüstan Milli Bankı məlumat yayıb.
Məlumata görə, 2025-ci ildə Gürcüstandan xarici ölkələrə pulköçürmələrin ümumi həcmi 420,45 milyon dollara çatıb. Bu göstərici əvvəlki illə müqayisədə 11,2 faiz artım deməkdir.
Statistikaya əsasən, vəsaitlərin ən böyük hissəsi Türkiyə, Azərbaycan və Rusiya istiqamətinə yönəlib. Belə ki, Türkiyəyə 78,9 milyon dollar, Azərbaycana 66 milyon dollar, Rusiyaya isə 48 milyon dollar köçürülüb.
Eyni zamanda qeyd olunub ki, 2026-cı ilin ilkin göstəriciləri də artım dinamikasının davam etdiyini göstərir. Bu ilin fevral ayında Gürcüstandan 32,9 milyon dollar vəsait köçürülüb ki, bu da ötən ilin eyni dövrü ilə müqayisədə təxminən 4 milyon dollar çoxdur.
Bununla yanaşı, Gürcüstana daxil olan pulköçürmələrdə də artım qeydə alınıb. 2025-ci ildə ölkəyə ümumilikdə 3,649 milyard dollar vəsait daxil olub, cari ilin fevral ayında isə bu rəqəm 295 milyon dollar təşkil edib.
Mütəxəssislər bildirirlər ki, pulköçürmələrin artması region ölkələri arasında iqtisadi əlaqələrin genişlənməsi və xaricdə çalışan vətəndaşların aktivliyi ilə bağlıdır.
