“Enerji təhlükəsizliyi siyasəti Azərbaycan üçün prioritet məsələdir. Bu gün ölkəmiz öz enerji təhlükəsizliyini təmin edə bilmək üçün bütün resurslara malikdir”.
Bunu Ednews-a açıqlamasında iqtisadçı ekspert Fuad İbrahimov Mingəçevirdə yeni 1280 MVt gücündə ölkənin ən böyük İstilik Elektrik Stansiyasının inşasına münasibət bildirərkən qeyd edib. O, bildirib ki, bu qəbildən olan istənilən obyektin açılması və istifadəyə verilməsi dövlətimizin enerji təhlükəsizliyi siyasətini tamamlamış olur:
“Bilirsiniz ki, Rusiya-Ukrayna müharibəsi fonunda son dövrlərdə dünyada ən önəmli məsələlərdən biri enerji təhlükəsizliyi siyasətidir. Bu gün iqtisadi cəhətdən ən qüdrətli ölkələr belə enerji təhlükəsizliyi, enerjiyə olan tələbat baxımından aciz vəziyyətə qala bilir. Əgər biz ölkənin enerji təhlükəsizliyini tam təmin edə bilib, bunun ixracını da həyata keçirə bilsək gələcəyin iqtisadi cəhətdən dayanıqlı və güclü ölkəsinə çevrilə bilərik. Azərbaycan bunun üçün bütün münbit şəraitlərə sahibdir. Təbii sərvətlər və maliyyə ehtiyatlarımız bunu deməyə əsas verir. Artıq işğaldan azad edilmiş ərazilərdə on su elektrik stansiyası istifadəyə verilib. Bu gün hansı ölkələr öz enerji təhlükəsizliyini təmin edə bilsə, iqtisadi güc, strateji tərəfdaşlıq və investisiyaların cəzabədarlığı nöqteyi-nəzərindən də ən aparıcı ölkələrə çevriləcək”.
F.İbrahimov qeyd edib ki, yeni tikiləcək stansiya nəticəsində təbii qaz ehtiyatlarına qənaət edilməsi Azərbaycan qazının Avropaya tədarükünü artıracaq:
“İstənilən sahədə qənaət və artım, əlbəttə ki, ixrac mənbələrinin gəlir payını artırır. Enerji sahəsində müasir tələblərə cavab verən stansiyanın inşası birbaşa ixracatın artmasına zəmin yaradacaq”.
Ekspert onu da əlavə edib ki, stansiyanın xarici tərəfdaşlarla birlikdə inşası strateji əməkdaşlığa töhfə verəcək:
“Xüsusilə, İtaliya və Çin Azərbaycanın strateji partnyorlarıdır. Çinin 2013-cü ildə irəli sürdüyü “Bir yol, bir kəmər” siyasəti bu gün dövlətimiz tərəfindən dəstəklənir. Digər tərəfdən, Azərbaycanın TAP və TANAP layihələri ilə ən çox təbii qaz ixrac etdiyi ölkə İtaliyadır. Yəni, bu günə qədər də bu iki ölkə Azərbaycanın strateji tərəfdaşları idi və əməkdaşlıq davam etməkdədir. Çin və İtaliya şirkətlərinin yeni elektrik stansiyasının inşasına cəlb edilməsi mövcud iqtisadi əlaqələri daha da gücləndirəcək”.
Törə Zeynallı