İqtisadi və Sosial İnkişaf Mərkəzi verdiyi ümumi məlumatda bildirib ki, son aylarda daşınmaz əmlak bazarında qiymət artımı müşahidə olunub. Fərdi yaşayış evləri mənzillərə nisbətən 0.4% daha çox bahalaşıb. Məsələ ilə bağlı ekspertlərin fikrini öyrəndik.

İqtisadçı ekspert Xalid Kərimli Ednews-a açıqlamasında bildirib ki, bunun səbəbi əsasən mövsümlə əlaqəlidir, böyük xarici təsirləri yoxdur.

“Hər il yaz, yay aylarında kirayə evlərin qiymətləri digər aylara nisbətən daha çox artır. İnsanların istirahət üçün bağ evlərinə üz tutması fərdi yaşayış evlərinin qiymətlərinin artmasının əsas səbəbidir. Bununla əlaqədar, ümumiyyətlə, bu aylarda daşınmaz əmlak bazarında canlanma olur. Həm mənzillərin, həm də torpaq sahələrinin qiymətlərində artım müşahidə olunur. Bunun da səbəbi yenə kirayələrin qiymətləri ilə bağlıdır. Universitetlərə qəbul imtahanları, tələbə adı almış abituriyentlərin kirayə mənzil axtarışına çıxması, tələbin artması ilə təklifin azalması kirayə mənzillərin qiymətinin artmasına səbəb olur”. 

Ekspert həmçinin vurğulayıb ki, 2023-cü ildə Türkiyədə baş verən zəlzələ son dövrlərdə əhalinin mənzil yox, fərdi yaşayış, yəni bağ evlərinə üz tutmağının əsas səbəbidir. 

Daşınmaz əmlak məsələləri üzrə ekspert Vüqar Oruc saytımıza açıqlamasında bildirib ki, Azərbaycanın 30 ildən çox işğal altında qalan əraziləri azad olunması və bu ərazilərdə infrastruktur bərpası ölkəmizin investisiya cazibədarlığını artırıb. 

“İnşaat materiallarının və torpaq sahələrinin ucuzluğu insanları tikinti sektoruna yönəldirdi. 2015-ci ildəki devolvasiyadan sonra ölkədə daşınmaz əmlak sektorunda qiymətlərin də bahalaşmasına səbəb oldu. Bu gün Azərbaycana investisiya qoymaq istəyən şəxslər başa düşür ki, ölkədə ən dözümlü yatırım istiqaməti məhz daşınmaz əmlak sektorudur. 2008-2010-cu illərdə azərbaycanda tikinti bumu yaşanırdı. Məsələn, Azərbaycanda mayak vəziyyətdə, təmirsiz bir mənzilə yatırım etdikdən 1 il sonra həmin mənzilin dəyəri 10-12, bəzi ərazilərdə isə hətta 15% artır”.

Ekspert deyib ki, daşınmaz əmlak növləri arasında ən təəccüblü məqam isə son illərdə bəzi ərazilərdəki torpaq sahələrinin dəyərinin 100% artmasıdır. 

Vüqar Oruc onu da vurğulayıb ki, mövsümi artımlardan sonra daşınmaz əmlak sektorunda qiymətlər müəyyən qədər aşağı ensə də əvvəlki qiymətinə dönmür. Hər mövsümi artım başa çatdıqdan sonra qiymətlər əvvəlkindən hər dəfə baha olur.

Ekspertlərin fikrincə, vətəndaşların fərdi yaşayış evlərinə üstünlük verməsi hələ uzun müddət davam edəcək. Çünki belə evlər mənzillərə nisbətən daha təhlükəsiz və dayanıqlı görünür.

Səfər Əlizadə