Türkiyə Mərkəzi Bankının ehtiyatları martın 19-da İstanbul meri Əkrəm İmamoğlunun saxlanıldığı vaxtdan bəri 68,2 milyard dollardan 33,5 milyard dollara düşüb.

“EDnews” xəbər verir ki, bu barədə “Sözcü” nəşri məlumat yayıb.

Türkiyə Mərkəzi Bankının rəhbəri Fatih Karahan daha əvvəl vurğulayıb ki, İstanbul bələdiyyə sədri korrupsiya və terrorçularla əlaqədə ittiham edilərək həbs edildikdən sonra türk lirəsini sabitləşdirmək üçün üç gün ərzində bazar müdaxiləsi zamanı 25 milyard dollar satılıb. Martın 19-da Türkiyənin milli valyutası 11%-dən çox ucuzlaşıb və İstanbul birjasında ticarət bir neçə dəfə dayandırılıb.

Nəşr qeyd edib ki, bazarlarda yaranan vəziyyət Türkiyə hakimiyyətinin inflyasiyanı ilin sonuna kimi 24%-ə endirmək səylərini puça çıxara bilər.

Maliyyə bazarlarındakı dalğalanmaları şərh edən Türkiyənin maliyyə naziri Mehmet Şimşək bunların uzunmüddətli effekt verməyəcəyini deyib:

“Aydındır ki, inflyasiya azalır və bundan sonra da azalacaq. Son iğtişaşların uzunmüddətli nəticələri olacağını düşünmürəm. Lirənin dollara nisbətdə təxminən 3-3,5% ucuzlaşması apreldə məhdud təsir göstərə bilər, lakin orta müddətli - bir il və ondan sonrakı dövrə nəzər salsaq, bu, inflyasiyanın azalmasına gətirib çıxaracaq. Qarşımızda 2027-ci ilə qədər inflyasiyanı birrəqəmli səviyyəyə endirmək hədəfimiz var”.