Fevralın 13-də PKK (Kürdüstan Fəhlə Partiyası) terror təşkilatının de-fakto lideri Cəmil Bayıkın verdiyi açıqlamadan sonra, Suriya Demokratik Qüvvələrinin lideri, Türkiyə Daxili İşlər Nazirliyi və İnterpol tərəfindən axtarışda olan Məzlum Kobani də bənzər açıqlama ilə çıxış edib. Belə ki, hər iki terrorçu Abdullah Öcalanın silahı yerə qoymaq çağırışının əhəmiyyətindən danışıb. Cəmil Bayık Öcalanın kürd məsələsini müharibə zəminindən demokratikləşmə zəmininə çıxarmaq üçün göstərdiyi səyləri yüksək qiymətləndirib və hər kəsin bu prosesə dəstək verməsinin zərurətini vurğulayıb. Qeyd edək ki, PKK-nın qurucusu Abdullah Öcalan həbsdən azad olunacağı təqdirdə PKK və YPG-nin silahı yerə qoyub, dinc mübarizə aparacağını deyib.
Nəzərə alsaq ki, Suriyada dəyişən konyunktura PKK-YPG-nin mövcudluğunu onsuz da sual altında saxlayır, Türkiyənin Suriya və PKK ilə bağlı strategiyalarını da yenidən formalaşdırır. Çünki Əsəd rejimi devriləndən sonra yeni Əhməd əş-Şaara hökuməti Suriyada PKK və YPG-nin təsirini azaldıb. Bu da Öcalanın çağırışına zəmin yaradır və ola bilər ki, terrorçular mövcud vəziyyətdən daha az itki ilə çıxmaq istəyirlər.
Bəs bu proses nə qədər uğurlu ola bilər? PKK-nın demokratik yolla fəaliyyəti nə anlama gəlir və bu, mümkündürmü? Habelə Türkiyə bu prosesdə arzuolunan nəticəyə nail olsa, təkcə PKK-nın deyil, Yaxın Şərqdəki digər problemlərin də öhdəsindən gələ biləcək?
Mövzunu Oxu.Az-a dəyərləndirən Türkiyənin "Yeni Akit" qəzetinin Ankara bürosunun xəbərlər departamentinin rəhbəri Muhammet Kutlu bildirib ki, Milliyyətçi Hərəkat Partiyasının (MHP) sədri Dövlət Baxçalının 15 oktyabr 2024-cü il tarixində irəli sürdüyü və hər kəsi təəccübləndirən təklifi bu günlərdə Xalqların Bərabərlik və Demokratiya Partiyasının (DEM) heyətinin təşkil etdiyi ziyarətlərlə reallaşmış vəziyyətdədir:
"DEM Partiya heyəti əvvəlcə İmralı adasında cəzasını çəkməkdə olan terror təşkilatı PKK-nın qurucusu Abdullah Öcalanı ziyarət etdi. Bu ziyarətdə Öcalan Baxçalının çağırışına son dərəcə müsbət yanaşma nümayiş etdirdi və PKK-nın silahı yerə qoyması üçün üzərinə düşən vəzifəni yerinə yetirə biləcək təsirdə olduğunu söylədi. Hakim Ədalət və İnkişaf Partiyası daxil bütün partiyalarla geniş müzakirələr aparıldı, prosesin vaxt itirmədən həyata keçirilməsi istiqamətində mesajlar verildi. DEM Partiyasının İmralı heyəti son olaraq dünən Şimali İraqda Kürdüstan Demokrat Partiyasının (KDP) sədri Məsud Barzani ilə görüşdü və prosesin uğurlu olması üçün səylərin artırılmasının zərurəti vurğulandı".
"Lakin Ankarada - siyasi elitada DEM Partiyasının prosesə mane olması ilə bağlı iddialar da irəli sürülür. Digər tərəfdən, DEM Partiyası və PKK tərəfdarı olan dairələr ilk uğursuz prosesdə olduğu kimi, bu dəfə də Türkiyə Konstitusiyasının dəyişilməsi ilə bağlı şərtlər irəli sürmək istəyirlər. Lakin Baxçalının təklifi Türkiyənin nəinki terror təşkilatı və tərəfdaşları ilə bir masaya oturmasını gündəmə gətirir, əksinə, Türkiyədəki terrorçuların sayının tamamilə azalması, terror təşkilatının ləğvi və bir daha bu cür separatçı fəaliyyətə cəhd edilməməsi ilə bağlıdır. PKK və DEM Partiya bu prosesi qəsdən yubatsalar, əllərinə keçən son tarixi fürsəti də qaçırmış olacaqlar", - deyə müsahibimiz əlavə edib.
Onun sözlərinə görə, hər şeydən əvvəl Dövlət Baxçalının bu təklifi İsrailin Qəzzada hücumlarını artırdığı, Livanın cənubuna yeni hücumlar təşkil etdiyi və Türkiyə ilə qarşıdurma ehtimalının artdığı bir dövrdə ölkəmizin daxili bütövlüyünü, birliyini təmin etmək məqsədi daşıyır:
"Əks halda, Türkiyə və PKK-nın bərabərhüquqlu tərəf kimi danışıqlar masasına oturmasından söhbət gedə bilməz".
